पुणे : शहरातले चौक, रस्ते होर्डिंगने गजबजलेले आहेत तरीही वर्षानुवर्षे पुणे महापालिका त्यावर कारवाई करत नव्हती. आता शहराचे विद्रुपीकरण थांबण्यासाठी कारवाईचा बडगा उगारत महापालिकेने नऊ महिन्यात 642 होर्डिंग जमीनदोस्त केले आहेत. तरीही शहरात अद्याप 1 हजार 300 अनधिकृत होर्डिंग्जचा वापर सुरू आहे.
शहराला अनधिकृत होर्डिंग्ज, फ्लेक्स, जाहिरातींचा विळखा बसला आहे. पुणे महापालिकेने 2018 ते 2022 या चार वर्षात एकूण 1343 होर्डिंग्ज काढून टाकले पण तरीही अजून अनधिकृत होर्डिंग्जचा वापर सुरूच आहे.
राजकीय, जाहिरात आणि वेगवेगळ्या विषयांचे बॅनर जागोजागी दिसतात. बहुतांश बॅनर हे अनधिकृत असतात.
महापालिकेकडून बॅनर लावायला परवानगी दिली जाते पण अनेकदा परवानगी न घेताच ते लावले जातात. अशावेळी महापालिकेचा महसूलही बुडतो. म्हणून महापालिकेच्या आकाशचिन्ह विभागाकडून अनधिकृत होर्डिंग्जवर कारवाई करण्यात येते.
अनधिकृत जाहिरात फलकावर कारवाई केल्यानंतर 50 हजार रुपयांचा दंड जाहिरात फलकधारकांकडून वसूल करण्यात येतो. पुणे महापालिकेने 2022 या वर्षात एप्रिल ते डिसेंबर या नऊ महिन्यात 642 होर्डिंग्जवर कारवाई केली.
त्यातील अवघ्या 25 होर्डिंगधारकांकडून दंड वसूल केला. अद्याप 2 कोटी 52 लाखांचा दंड वसूल करणं बाकी आहे.
शहरातील हे अनधिकृत होर्डिंग्ज वाहतुकीला अडथळा ठरतात. काही ठिकाणी सिग्नल यंत्रणा या होर्डिंग्जमुळे झाकली जाते. शहरात 2 हजार 311 अधिकृत होर्डिंग्ज आहेत तर बाकी अनधिकृत आहेत.
