मुंबई : मनसे नेते संदीप देशपांडे यांच्यावर चार अज्ञातांनी जीवघेणा हल्ला केल्याची धक्कादायक घटना घडली आहे. मॉर्निंग वॉकला बाहेर पडले असता देशपांडे यांच्यावर क्रिकेटच्या स्टम्पने हल्ला करण्यात आला आहे. या हल्ल्यामध्ये देशपांडे जखमी झाले असून त्यांच्यावर हिंदुजा रुग्णालयात उपचार सुरू आहेत.
मिळालेल्या माहितीनुसार, आज मॉर्निंग वॉकला बाहेर पडले असताना चार अज्ञातांनी संदीप देशपांडे यांच्यावर हल्ला केला. क्रिकेटच्या स्टंपने हा हल्ला केला आहे. हा हल्ला राजकीय वैमानस्यातून झाला असल्याचा संशय व्यक्त करण्यात येत आहे. प्रसंगावधान राखून देशपांडे यांनी स्वतःचा बचाव केला. त्यामुळे त्यांनी त्यांच्या डोक्यावर होणारा घाव परतवून लावला परंतु त्यांच्या हाताला दुखापत झाली आहे.
कोण आहेत संदीप देशपांडे
संदीप देशपांडे हे राज ठाकरे यांचे निकटवर्तीय असून जेव्हा राज ठाकरे यांनी मनसेची स्थापना केली तेव्हापासून संदीप देशपांडे राज ठाकरेंसोबत आहेत. एक कट्टर मनसैनिक म्हणून त्यांची ओळख आहे. शिवसेनेच्या विद्यार्थी संघटना असलेल्या भारतीय विद्यार्थी सेनेतून त्यांच्या राजकीय कारकीर्दीला सुरुवात झाली होती.