मुंबई : भ्रष्टाचार प्रकरणी अनिल देशमुख यांना जामीन मंजूर करण्यात आला होता. मुंबई उच्च न्यायालयाने एक लाख रुपयांच्या जात मुचलक्यावर अनिल देशमुख यांना जामीन मंजूर केला आहे. 13 महिन्यानंतर अनिल देशमुख यांना जामीन मंजूर झाला होता. तथापि सीबीआयच्या मागणीनंतर या जामीनाला आता दहा दिवसांची स्थगिती देण्यात आली आहे. सीबीआयने न्यायालयात विनंती करून देशमुख यांच्या जामीन अर्जाला स्थगिती देण्याची मागणी केली होती. त्यामुळे आता पुढचे दहा दिवस देशमुख यांचा मुक्काम पुन्हा तुरुंगातच असणार आहेत.
अनिल देशमुख यांचे वकील अनिकेत निकम यांनी दिलेल्या सविस्तर माहितीनुसार, अनिल देशमुख यांना उच्च न्यायालयाने एक लाख रुपयांच्या जातमुचलक्यावर जामीन मंजूर केला. सीबीआयच्या विनंतीनंतर उच्च न्यायालयाने जामिनावर दहा दिवसांची स्थगिती दिली आहे. न्यायालयाने जामीन मंजूर करताना देशमुख यांचे पासपोर्ट प्रशासनाकडे जमा करणे, पुढील तपासात सहकार्य करणे या अटी लागू केल्या असून त्यामुळे पुढचे दहा दिवस अनिल देशमुख यांना तुरुंगातच राहावे लागणार आहे.