ऑनलाईन फसवणुकीच्या घटनांत दिवसेंदिवस वाढ होत आहे. फोन पे गुगल पेसह एटीएम फसवणुकीच्या घटना देखील रोज घडतात. त्यामुळं एटीएम वापरताना काय काळजी घ्यावी आणि एटीएम फ्रॉड कसं टाळावं जाणून घ्या.
एटीएममधून पैसे काढताना एटीएम पिनचा वापर काळजीपूर्वक करा. तसेच, गुप्तपणे पिन प्रविष्ट करा. लक्षात ठेवा की, तुम्ही एटीएममध्ये पैसे काढण्यासाठी गेलात तेव्हा तेथे कुणीही नसावे. इतर कोणी असल्यास, त्या व्यक्तीस बाहेर जाण्यास सांगा आणि संशय असल्यास, त्या एटीएममधून ताबडतोब बाहेर या.घाईघाईत पैसे काढण्यासाठी अनेक वेळा आपण आपल्या मित्रांना किंवा नातेवाईकांना एटीएम कार्ड आणि पिन देतो. असे करणे अल्पावधीत सोयीचे असू शकते, परंतु दीर्घकाळात तुमची फसवणूक होऊ शकते. अशी चूक करू नका. आजकाल अशा घटनाही समोर येत आहेत ज्यात जवळच्या लोकांनीच लाखो रुपयांची फसवणूक केली आहे.
काही कारणास्तव तुम्हाला एटीएम पिन आणि कार्ड कुणाला द्यायचे असल्यास ताबडतोब कार्डचा पिन बदला आणि बँक स्टेटमेंट पहा.एटीएममधून पैसे काढताना घाई करू नका. सर्वप्रथम, एटीएमच्या आतील बाजूस एक नजर टाका आणि कोणताही छुपा कॅमेरा बसवला आहे की नाही हे एका नजरेने पहा. एटीएम कार्ड स्लॉट देखील तपासा कारण स्कॅमर कधीकधी एटीएममध्ये क्लोनिंग उपकरणे किंवा कार्ड रीडर चिप्स ठेऊ शकतात. हे उपकरण एटीएम कार्डचा डेटा चोरते यामुळे तुम्ही फसवणुकीला बळी पडता. अशा परिस्थितीत जर काही शंका असेल तर ते एटीएम वापरू नका.तुम्ही तुमचा एटीएम पिन वेळोवेळी बदलत राहिल्यास तुमच्यासोबत फसवणूक होण्याची शक्यता खूप कमी होते. यावर बँक तुम्हाला सल्लाही देते. तसेच, विशिष्ट पॅटर्न किंवा तत्सम संख्यांचा पिन बनवू नका. तुमची जन्मतारीख, मोबाईल नंबरचे अंक, 0000, 1111 सारखे अंक वापरू नका
या सोप्या टिप्स फॉलो करा. एटीएम वापरताना अशा चुका करणं टाळा. कुठलाही ऑनलाईन व्यवहार करताना विशेष काळजी घेण्यास विसरू नका.
