गोंडा – अल्पवयीन मुलीवर बलात्कार केल्याप्रकरणी तुरुंगात असलेल्या आसाराम बापूच्या आश्रमात आता आणखी एक खळबळजनक घटना घडली आहे. बहराइच रोडवर असलेल्या आसारामबापूच्या आश्रमात मागील अनेक दिवसांपासून उभ्या असलेल्या कारमध्ये एका अल्पवयीन मुलीचा मृतदेह आढळून आला आहे. ही मुलगी ५ एप्रिलपासून बेपत्ता होती.
गाडीतून दुर्गंधी येऊ लागल्याने आश्रमाच्या कर्मचाऱ्यांनी गाडीचा दरवाजा उघडला असता त्यात मुलीचा मृतदेह पडलेला आढळून आला. पोलिसांना याबाबतची माहिती देण्यात आली. पोलिसांनी मुलीचा मृतदेह ताब्यात घेऊन पोस्ट मॉर्टेमसाठी पाठवला आहे. तसंच संबंधित आश्रम सील करून त्या ठिकाणी पोलीस तैनात करण्यात आले आहेत.
मृत मुलीच्या आईने दिलेल्या माहितीनुसार, ही मुलगी मंगळवारपासून (5 एप्रिल) बेपत्ता होती. घराजवळच्या परिसरात तिला शोधण्याचा प्रयत्न कुटुंबीयांनी केला; मात्र त्यात यश आलं नाही. शेवटी पोलिसांकडे तक्रार दाखल करण्यात आली.
मुलीचे वडील तीन वर्षांपासून बेपत्ता
मुलीचे वडीलही गेल्या तीन वर्षांपासून गूढपणे बेपत्ता झाले होते. त्याचाही तपास पोलीस करत आहेत. सध्या आश्रमाला कुलूप लावण्यात आले आहे. आश्रमात कोणालाही प्रवेश दिला जात नाही.
