महाराष्ट्र : राष्ट्रीय तपास संस्थेने पॉप्युलर फ्रंट ऑफ इंडियाच्या विरोधात जोरदार कारवाईचा बडगा उगारला आहे. दरम्यान नाशिक आणि पुण्यातील PFI च्या संशयित कार्यकर्त्यांना अटक केल्यानंतर आता महाराष्ट्रातील इतर महत्त्वाच्या शहरांमध्ये देखील जोरदार कारवाई सुरू केली आहे. महाराष्ट्रातील औरंगाबाद ,ठाणे सोलापूर ,नांदेड ,जालना आणि परभणी या शहरांमध्ये राष्ट्रीय तपास संस्थेने धडक कारवाई सुरू केली आहे .
या छापेमारीमध्ये PFI च्या संशयित कार्यकर्त्यांना अटक करण्यात आली आहे. दरम्यान राष्ट्रीय तपास संस्था आणि एटीएस त्यासह गुन्हे शाखेच्या पोलिसांच्या पथकाने हे छापे टाकले आहेत. सोलापुरातून एका संशयताला अटक करण्यात आली आहे. तर औरंगाबाद शहरातून 14 जणांना आतापर्यंत अटक करण्यात आली आहे. त्यासह ठाण्यातून एक संशयित ताब्यात घेण्यात आलय. या सर्वांना लवकरच न्यायालयात हजर करण्यात येईल.
राष्ट्रीय तपास संस्थेने आतापर्यंत आठ राज्यांमध्ये 25 हून अधिक ठिकाणी छापेमारी केली आहे. राष्ट्रीय तपास संस्था, इडी आणि एटीएसने आत्तापर्यंत 95 ठिकाणी छापे टाकून 106 PFI च्या कार्यकर्त्यांना अटक केली.
