अकोला- अकोला नांदेड महामार्गावर खासगी ट्रॅव्हल्स बस आणि टँकरच्या भीषण अपघातात तिघांचा जागीच मृत्यू झाला तर ८ जण गंभीर जखमी झाले. हा अपघात आज सकाळी घडला. या अपघाताची दृश्ये सीसी टीव्ही कॅमेऱ्यात कैद झाली आहेत. बघता-बघता टँकर थेट बसमध्ये घुसताना या व्हिडिओमधून पाहायला मिळतो.
पुण्यावरुन यवतमाळला जाणारी खासगी बस आणि समृद्धी महामार्गावर जाणारा पाण्याचा टॅंकर यांचा आज सकाळच्या सुमारास अपघात झाला. वाशिम शहराजवळ असलेल्या अकोला नाका परिसरात हॉटेल इव्हेंटोजवळ हा अपघात झाला. चालकाचे नियंत्रण सुटल्याने समोरासमोर धडक होऊन भीषण अपघात झाल्याची प्राथमिक माहिती आहे. मृतांमध्ये दोन्ही वाहनांचे चालक आणि खासगी बसचा क्लिनर यांचा समावेश आहे. खासगी ट्रॅव्हल्समधील 7 प्रवाशी तर टँकरमधील एक जण जखमी असल्याची माहिती आहे. जखमींवर वाशिम शासकीय रुग्णालयात उपचार सुरु आहेत.