मुंबई : शिक्षक पात्रता परीक्षा घोटाळ्यातील TET SCAM मधील संबंध उघड झाल्यानंतर अब्दुल सत्तार यांच्या मंत्रिपदावर हात आया मुह ना लगा …! अशी परिस्थिती निर्माण झाली होती. अब्दुल सत्तार यांना आता मंत्रिपद मिळणं एकीकडे अशक्य असे वाटत असतानाच आज मंत्रिमंडळ विस्तारामध्ये अब्दुल सत्तार यांच्या गळ्यामध्ये मंत्रिपदाची माळ पडल्यानंतर सर्वांच्याच भुवया उंचावल्या आहेत.
टीईटी परीक्षेमध्ये 2019 मध्ये गैरव्यवहार झाल्याचे उघड झालं .या गैरव्यवहारातून 7,800 अपात्र उमेदवारांना देखील पात्र ठरवण्यात आलं होतं . बोगस प्रमाणपत्र वाटण्यात आल्याचं चौकशीमध्ये उघड झाल्यानंतर या विद्यार्थ्यांना आता परीक्षा बंदी करण्यात आली आहे. त्याचबरोबर नोकरीचे पद देखील रद्द करण्यात आलं .धक्कादायक म्हणजे या संपूर्ण प्रकरणांमध्ये जेव्हा आमदार अब्दुल सत्तार यांचा संबंध उघड झाला ,आणि त्यांच्या दोन्ही मुलींची नावे देखील निष्पन्न झाली ,त्यानंतर राजकीय वर्तुळात एकच खळबळ उडाली आहे.
दरम्यान अब्दुल सत्तार यांचं मंत्रीपद आता अशक्य असल्याचं बोललं जात असतानाच शिंदेंच्या कॅबिनेटमध्ये सत्तार यांची देखील वर्णी लागली आहे. दरम्यान शिंदे-भाजप सरकारकडून एकमेव मुस्लिम आमदार असलेले अब्दुल सत्तार यांना संधी देणं राजकीय दृष्ट्या महत्त्वाचं असल्याकारणानेच शिंदे भाजप सरकारने अब्दुल सत्तार यांची मंत्रिपदी वर्णी लावली असल्याचं बोललं जात आहे.
