सातारा : सातारा जिल्ह्यातील अजिंक्यतारा किल्ल्यावर फिरायला गेलेले एक 64 वर्षीय वृध्द पाय घसरून थेट दरीत कोसळले. बचाव पथकला त्यांचा जीव वाचवण्यात यश आलं. दौंडमधील ६४ वर्षीय हणमंत जाधव हे साताऱ्यातील अजिंक्यतारा किल्ल्यावर फिरण्यासाठी गेले होते. तिथे त्यांचा पाय घसरला आणि ते किल्ल्यावरुन थेट दरीत कोसळले.
रात्रीचा किर्र अंधार आणि कोसळणाऱ्या पावसात तब्बल १४ तास हणमंत जाधव दरीत पडून होते. मात्र सकाळी व्यायामाला गेलेल्या नागरिकांच्या निदर्शनास आलं असता तात्काळ पोलिसांना फोन करुन मदत पथकाला बोलावण्यात आलं. काल सायंकाळच्या सुमारास हणमंत जाधव पाय घसरल्याने दरीत कोसळले होते.
मदतीसाठी जवळपास कुणीच नसल्यामुळे संपूर्ण रात्र आणि १४ तासांहून अधिक काळ ते दरीत अडकून पडले होते. अखेर शिवेंद्रराजे रेस्क्यू टीमच्या मदतीने जाधव यांना दरीतून बाहेर काढण्यात आलं. त्यांना रुग्णालयात उपचारासाठी दाखल करण्यात आलं आहे.