पुणे : पुण्यातील निवृत्त कर्मचाऱ्यांसाठी आनंदाची बातमी आहे. सेवानिवृत्त झालेल्या पेन्शन धारकांना आता घरबसल्या हयातीचा दाखला तयार करता येणार आहे. हा दाखला तयार करण्यासाठी पुण्यात विशेष प्रशिक्षण केंद्र तयार करण्यात आलं आहे.त्यामुळे हा दाखला काढण्यासाठी करावी लागणारी वणवण आता थांबणार आहे.
केंद्र सरकारसह विविध सरकारी खात्यातून सेवानिवृत्त झालेल्या कर्मचाऱ्यांना दरमहा पेन्शन अर्थात निवृत्ती वेतन मिळते; मात्र त्यासाठी दरवर्षी नोव्हेंबर महिन्यात तुम्ही जिवंत आहे की नाही, याचे प्रमाणपत्र बँकेला सादर करावे लागते. ते वेळेत सादर केले नाही, तर तुमची पेन्शन बंद होते. हे प्रमाणपत्र सादर करण्यासाठी निवृत्ती वेतनधारकांना बँकेत जावे लागते. कागदपत्रांची पूर्तता करावी लागते. याचा त्रास दरवर्षी ज्येष्ठ नागरीकांना सहन करावा लागत होता. आता हा त्रास केंद्र सरकारने कमी केला आहे. त्यासाठी ‘जिवनप्रमाण ॲप’ विकसित करण्यात आले आहे.
राज्य अथवा केंद्र सरकारचे निवृत्ती वेतनधारकांचा त्रास कमी करण्यासाठी ही सुविधा निर्माण करण्यात आली आहे. प्रायोगिक तत्त्वावर देशातील ३७ शहरांमध्ये ही सुविधा पहिल्या टप्प्यात देण्यात आली आहे. त्यामध्ये पुणे शहराचाही समावेश आहे. सेवानिवृत्तधारकांना जीवन प्रमाणपत्र देण्यासाठी बँकेत जाण्याची गरज नाही.
