पुणे : व्यवसायिकाचे अपहरण करून त्यांना मारहाण केल्याप्रकरणी कुप्रसिद्ध गुन्हेगार गज्या मारणे याच्यासह टोळीतील 14 जणांवर गुन्हा दाखल करण्यात आला आहे. या टोळक्यावर मोक्कांतर्गत कारवाई करण्यात आली आहे. गज्या मारणे याने तळोजा तुरुंगातून सुटल्यानंतर मुंबई पुणे महामार्गावर रॅली काढली होती. यावरून त्याच्यावर पुन्हा गुन्हा दाखल झाला होता. वर्षभराच्या स्थानबद्धतेच्या कारवाईनंतर आता सुपारी घेऊन धमकावल्याप्रकरणी त्याच्यावर गुन्हा दाखल झाला आहे.
तक्रारदार सिंहगड रोड येथे राहत असून त्यांचा रियल इस्टेट आणि शेअर ट्रेडिंगचा व्यवसाय आहे. 7 ऑक्टोबर रोजी तक्रारदार आणि त्यांचा मित्र यांना आयसीआयसीआय बँक कात्रज येथे असताना काही इसमांनी जबरदस्तीने अपहरण करून गाडीमध्ये बसवले. मुंबई बेंगलोर हायवे रोडने रात्रभर वेगवेगळ्या गाडीमध्ये त्यांना फिरवण्यात आलं. त्यांच्यावर खोटा बलात्काराचा गुन्हा दाखल करण्याची धमकी त्यांना देण्यात आली. त्यांना मारहाण देखील करण्यात आली.
तसेच त्यांच्याकडे असलेली गाडी जबरदस्तीने काढून घेऊन वीस कोटींची मागणी करण्यात आली होती. तर हे 20 कोटी न दिल्यास त्यांच्या हत्येची देखील त्यांना धमकी देण्यात आली होती. या प्रकरणी आता या टोळक्यावर मोक्का अंतर्गत कारवाई करण्यात आली आहे.
पोलीस आयुक्त अमिताभ गुप्ता यांनी पुणे आयुक्तालयाचा कार्यभार घेतल्यानंतर त्यांच्या मार्गदर्शनाखाली मोक्का अंतर्गत सन 2022 या चालू वर्षांमध्ये करण्यात आलेली ही 39 वी कारवाई असून आत्तापर्यंत एकूण 102 कारवाई करण्यात आल्या आहेत.
