पुणे: पुण्याचे खासदार गिरीश बापट यांच्या निधन झाल्यानं पुणे लोकसभा पोटनिवडणुकीची चर्चा सुरू झाली असून भाजप आणि काँग्रेस-राष्ट्रवादीमध्ये ही जागा लढवण्यासाठी अनेक इच्छुक असल्याच पाहायला मिळत आहेत.
भाजपमध्ये गिरीश बापट यांच्या सून स्वरदा बापट, माजी महापौर मुरलीधर मोहोळ, शहराध्यक्ष जगदीश मुळीक, आणि कोथरूडच्या माजी आमदार मेधा कुलकर्णी तर काँग्रेसकडून प्रदेश उपाध्यक्ष मोहन जोशी पुणे शहराध्यक्ष अरविंद शिंदे आणि कसब्याचे विद्यमान आमदार रवींद्र धंगेकर यांची नावं आघाडीवर आहेत तर या जागेवर राष्ट्रवादीनं दावा करत शहराध्यक्ष प्रशांत जगताप देखील लोकसभा लढवण्यासाठी इच्छुक आहेत.
याच पार्श्वभूमीवर भाजपा महिला मोर्चाच्या राष्ट्रीय उपाध्यक्ष आणि कोथरूड विधानसभा मतदारसंघाच्या माजी आमदार मेधा कुलकर्णी यांनी पुणे लोकसभा पोटनिवडणुकीसंदर्भात आपली प्रतिक्रिया दिली आहे. पक्षाने संधी दिली तर मी पुणे लोकसभा लढवण्यासाठी तयार असल्याचं त्यांनी म्हटलं आहे.
आतापर्यंत पक्षाने जी जबाबदारी मला दिली, ती मी पार पाडली आहे. आधी लोकप्रतिनिधी म्हणून आणि नंतर पक्ष संघटनेतून जनतेचे कामं केली आहेत. आता पक्षाने काही जबाबदारी दिली, तर ती देखील मी पार पाडण्याचा प्रयत्न करेन. लोकसभेसाठी माझं नाव चर्चेत आहे. हे खरं आहे. पक्षाने संधी दिली तर मी निश्चितच पुणे लोकसभा लढवण्यासाठी तयार आहे. विधानसभा निवडणुकीत पक्षाचा आदेश पाळला आणि आताही पक्षाने लढण्याचे सांगितले, तर तो आदेश मानून नक्कीच पोटनिवडणूक लढवेन, असं मेधा कुलकर्णी म्हणाल्या आहेत.