मुलांशी निगडीत महत्त्वाची कामे पार पाडण्यसााठी आधार आवश्यक आहे. आधार कार्डशिवाय पाल्य एखाद्या सरकारी योजनेचा लाभ घेऊ शकत नाही. शाळेत प्रवेशासाठी देखील मुलांकडे आधार कार्ड असणे गरजेचे आहे. आधार कार्डचे महत्त्व आणि गरज पाहता ‘UIDI’ ने नवजात बालकासाठी आधार कार्ड जारी करण्यास सुरवात केली आहे. लहान मुलाचे आधार कार्ड कसे काढावे आणि त्यास कोणत्या कागदपत्रांची गरज भासते, हे जाणून घेऊ.
आधार केंद्र किंवा अंगणवाडीतही आधार कार्ड
देशात अनेक रुग्णालयात मुलांचा जन्म होतो. त्यांचे आधार कार्ड काढण्याची सुविधा आता सर्वत्र उपलब्ध झाली आहे. याशिवाय मुलांचे आधार कार्ड हे जवळचे आधार केंद्र किंवा अंगणवाडी केंद्रातही काढता येऊ शकते. मुलांचे आधार कार्ड काढण्यासााठी आपल्याला आधार एनरोलमेंट फॉर्म भरावा लागेल. आणि त्यानुसार सर्व माहिती भरावी लागेल. अर्जाबरोबर काही कागदपत्रांची झेरॉक्सही जोडावी लागेल.
प्रक्रिया
भरलेला अर्ज काऊंटरवर बसलेल्या कर्मचार्‍याला द्या. त्यानंतर संबंधित कर्मचारी हा आपल्या मुलाचे आधार कार्ड तयार करण्यासाठी एनरोलमेंटची प्रक्रिया सुरू करेल. पाल्याचे नाव, वडिलांचे नाव, घराचा पत्ता, जन्मतारीख, लिंग आदी भरल्यानंतर आणि सर्वांची पडताळणी झाल्यानंतर कर्मचारी हा पाल्याचा फोटो काढेल. ही प्रक्रिया पूर्ण झाल्यानंतर एकनॉलेजमेंट स्लिप दिली जाईल. ही स्लिप सांभाळून ठेवा. कारण याच एनरोलमेंट नंबरने आपण आधार कार्डचे ऑनलाइन स्टेट्स पाहू शकता आणि डाऊनलोड करू शकता.
कोणत्या कागदपत्रांची गरज ?
मुलांचे आधारकार्ड तयार करण्यासाठी आपल्याला विशेष कागदपत्रांची गरज भासत नाही. मुलाचे आधार कार्ड काढण्यासाठी जन्मतारखेचा दाखला किंवा रुग्णालयातील डिस्चार्ज पेपर असणे गरजेचे आहे. त्याचबरोबर पालकांपैकी एकाचे आधार असणे गरजेचे आहे. पाच वर्षापेक्षा कमी वयोगटातील मुलांच्या आधारकार्डला ‘बाल आधार’ असे म्हटले जाते आणि ते फिकट निळ्या रंगाचे असते.
