छत्रपती संभाजी नगर: तलाठी भरती परीक्षेत (Talathi Bharti News) परीक्षार्थींना उत्तरे पुरवणारे रॅकेट छत्रपती संभाजीनगर शहरातील सिडको एमआयडीसी पोलिसांनी उघडकीस आणले आहे. परीक्षा घेणाऱ्या टीसीएस या कंपनीच्या दोन कंत्राटी कामगारांनी हाउसकीपिंगचे काम करणाऱ्या महिलेला पैशाची लालच देऊन परीक्षा सुरू असताना परीक्षार्थींना कागदावर उत्तरे लिहून देत उमेदवारांना कॉपी पुरवल्याचा प्रकार उघडकीस आला आहे. याप्रकरणी पोलिसांनी मोठी कारवाई करत 4 कर्मचाऱ्यांना अटक केली आहे.
काय आहे संपूर्ण प्रकरण?
छत्रपती संभाजीनगर जिल्ह्यातील चिकलठाणा येथे आय ऑन परीक्षा केंद्राबाहेरून परीक्षार्थी असलेल्या उमेदवारांना उत्तरे पुरवणाऱ्या राजू भीमराव नागरे याला पोलिसांनी अटक केली होती. नागरे याच्या मोबाईलमधून एक महत्त्वाची माहिती समोर आली आहे, यामध्ये परीक्षा केंद्रावर टीसीएस तर्फे कंत्राटी पर्यवेक्षक म्हणून नेमलेल्या दोन कर्मचाऱ्यांसह एका महिलेचा समावेश या रॅकेटमध्ये असल्याचे समोर आले आहे.
याप्रकरणी पोलिसांनी शाहरुख युनूस शेख (वय 27 रा. वैजापूर) पवन सुरेश शिरसाट (वय 26 राहणार सिडको) बाली रमेश हिवराळे (वय 30 रा. ब्रिज वाडी) आणि विकी रोहिदास सोनवणे (वय 30 च रा. चौका) यांना अटक केली आहे. या घटनेमुळे मोठी खळबळ उडाली आहे.
