नवी दिल्ली : वृत्तसंस्था – कर्नाटक चामराजनगरचे भाजपा खासदार व्ही श्रीनिवास प्रसाद (Srinivasa Prasad) यांचे रविवारी मध्यरात्री बंगळुरुतील एका खासगी रुग्णालयात निधन झाले आहे. वयाच्या 76 व्या वर्षी त्यांनी अखेरचा श्वास घेतला. माजी केंद्रीय मंत्री आणि विद्यमान खासदार व्ही श्रीनिवास प्रसाद यांचे मल्टी ऑर्गन फेल्युअरमुळे निधन झालं आहे. 22 एप्रिल रोजी त्यांना बंगळुरूतील मणिपाल रुग्णालयातील आयसीयूमध्ये दाखल केले होते.
कोण होते व्ही. श्रीनिवास प्रसाद?
व्ही. श्रीनिवास प्रसाद यांनी 1976 मध्ये जनता पक्षाकडून आपली राजकीय कारकीर्द सुरू केली होती. 1979 मध्ये त्यांनी काँग्रेस प्रक्षात प्रवेश केला होता. काही काळ जेडीएस, जेडीयू आणि समता पक्षाचे सदस्य राहिल्यानंतर त्यांनी भाजपमध्ये प्रवेश करून श्रीनिवास यांनी केंद्र सरकारपासून राज्यापर्यंत अनेक महत्त्वाची पदे दीर्घकाळ भूषवली.
1999 ते 2004 दरम्यान अटलबिहारी वाजपेयी यांच्या नेतृत्वाखालील सरकारमध्ये त्यांनी केंद्रीय राज्यमंत्रीपद भूषवल्यानंतर काँग्रेसमध्ये प्रवेश केल्यानंतर ते 2013 मध्ये आमदार झाले आणि सिद्धरामय्या सरकारमध्ये मंत्री झाले होते. 2016 मध्ये त्यांनी कर्नाटक विधानसभेचा राजीनामा दिल्यानंतर भाजपमध्ये प्रवेश केला. 2017 च्या पोटनिवडणुकीत, त्यांनी भाजपच्या तिकिटावर नंजनगुडमधून निवडणूक लढवल्यानंतर 2019 मध्ये पक्षाने श्रीनिवास यांना चामराजनगरमधून लोकसभा निवडणूक लढवायला लावली आणि ते विजयी झाले होते. काही दिवसांपूर्वीच त्यांनी राजकारण सोडण्याची घोषणा केली होती.
