इंदापूर : पुण्यातील इंदापूर मध्ये एक कार्गो विमान कोसळल्याची घटना मंगळवारी दुपारी १२ च्या सुमारास घडली आहे. याबाबत मिळालेल्या सविस्तर वृत्तानुसार , सुमारे 3500 फूट उंचीवरून हे विमान कोसळले आहे.
या विमानामध्ये प्रशिक्षणासाठी वापरले जाणारे ग्लायडर विमान अक्कलकोट वरून बारामतीला निघाले होते. बारामती मध्ये 1995 सालापासून कार्व्हर एव्हिएशन प्रायव्हेट लिमिटेड ही अकादमी सुरू आहे. यामध्ये एक शिकाऊ महिला उमेदवार भाविका राठोड किरकोळ जखमी झाल्या आहेत.
विमानाचे चालक टायटस यांनी सकाळी दहा वाजता अक्कलकोट होऊन उड्डाण भरले होते. तेथून ते बारामतीच्या दिशेने निघाले असता , इंदापूर मधील बाबर विद्यालयाच्या मागील बाजूस हे विमान कोसळले आहे.
दुपारी बारा वाजण्याच्या सुमारास हा अपघात घडला असून विमानातील तांत्रिक बिघाडामुळे अपघात झाला असल्याचे वैमानिक टायटस यांनी सांगितले आहे . तथापि अधिक तपासानंतर हा अपघात नक्की कसा घडला हे स्पष्ट होईल . दरम्यान या घटनेमध्ये प्रशिक्षणार्थी वैमानिक सिद्धार्थ टायटस हे जखमी झाले असल्याचे समजते. त्यांच्यावर रुई या गावांमध्ये प्राथमिक उपचार केल्यानंतर बारामती येथे त्यांना अधिक उपचारासाठी दाखल करण्यात आला आहे .
अपघाताची माहिती मिळताच बारामती नगरपरिषद आणि भवानीनगर कारखान्याच्या अग्निशमन दलास वर्दी देण्यात आली. बारामती पोलीस अधिकारी आणि विमान कंपनीच्या अधिकाऱ्यांनी देखील घटनास्थळी धाव घेतली आहे . या अपघातामध्ये सुदैवाने कोणतीही जीवित हानी झाली नाही.
