मुंबई : काल आरसीबी (RCB) आणि गुजरात (Gujrat) यांच्यात पार पडलेल्या सामन्यात युवा खेळाडू शुभमन गिलने (Shubman Gill) शतक झळकावून एक मोठा विक्रम आपल्या नावावर केला आहे. त्याच्या या शतकी खेळीच्या जोरावर गुजरातने आरसीबीवर दमदार विजय मिळवला आहे. या सामन्यात गुजरातने मिळवलेल्या विजयामुळे आरसीबीच्या संघाला प्लेऑफच्या शर्यतीतून बाहेर पडावे लागले. या विजयी खेळीसह शुभमनने पाकिस्तानी क्रिकेटपटू बाबर आझमला (Babar Azam) मागे टाकत एक मोठा विक्रम आपल्या नावावर केला आहे.
शुभमन गिलनं मोडला बाबर आझमचा विक्रम
कालच्या सामन्यात गुजरातच्या संघाची सुरुवात काहीशी खराब झाली. गुजरातचा सलामीवीर रिद्धिमान साहा (Wriddhiman Saha) केवळ 12 धावा करून पॅव्हेलियनमध्ये परतला. मात्र यानंतर शुभमन गिलने संघाची जबाबदारी आपल्या खांद्यावर घेत संघाच्या विजयात मोलाचा वाटा उचलला. त्याने 52 चेंडूत 5 चौकार आणि 8 षटकारांच्या मदतीने 104 धावा केल्या. गिलने या दमदार खेळीसह टी-20 क्रिकेटमधील 25 वेळा 50 हून अधिक धावा करण्याचा विक्रम केला आहे.
बाबर आझमचा मोडला रेकॉर्ड
शुभमन गिल टी20 क्रिकेटच्या इतिहासात 25 वेळा पन्नासहून अधिक धावा करणारा सर्वात तरुण खेळाडू ठरला आहे. त्याने पाकिस्तानच्या बाबर आझमला या बाबतीत मागे टाकले आहे. याआधी टी-20 क्रिकेटमध्ये सर्वाधिक वेळा 50 हून अधिक धावा करण्याचा विक्रम बाबर आझमच्या नावावर होता. आता तो शुभमन गिलच्या नावावर झाला आहे.
टी 20 क्रिकेटमध्ये 25 वेळा 50 हून अधिक धावा करणार युवा खेळाडू :
शुभमन गिल : 23 वर्ष 255 दिवस
अहमद शहजाद : 24 वर्ष 75 दिवस
बाबर आजम : 24 वर्ष 135 दिवस
ग्लेन फिलिप्स : 24 वर्ष 208 दिवस
इशान किशन : 24 वर्ष 272 दिवस
आयपीएलमध्ये सलग दोन शतकं झळकवणारा खेळाडू
आरसीबी विरुद्धच्या सामन्यापूर्वी शुभमन गिलने सनरायझर्स हैदराबाद (Sunrisers Hyderabad) विरुद्धच्या सामन्यात 101 धावांची खेळी केली होती. आयपीएलच्या इतिहासात सलग दोन शतकं झळकावणारा शुभमन गिल (2023)चौथा फलंदाज ठरला आहे. याआधी विराट कोहली(2023), शिखर धवन (2020) आणि जोस बटलर (2022) यांनी ही कामगिरी केली आहे.