नवी दिल्ली : वृत्तसंस्था – टीम इंडियाचा कर्णधार रोहित शर्माने (Rohit Sharma) नेपाळविरूद्धच्या सामन्यात उत्तम कामगिरी केली. यावेळी रोहितने 59 बॉल्समध्ये नाबाद 74 रन्सची कामगिरी केली. त्याच्या या खेळीमध्ये 6 फोर आणि 5 सिक्सेसचा समावेश होता. त्याच्या या उत्तम खेळीनंतर त्याला मॅन ऑफ द मॅचचा अवॉर्ड देखील देण्यात आला. या खेळीनंतर त्याच्या नावावर अनेक मोठे विक्रम झाले.
रोहितने मोडला कोहलीचा रेकॉर्ड
आशिया कपमध्ये (ODI आणि T-20) सर्वाधिक रन्स करण्याच्या बाबतीत रोहित (Rohit Sharma) दुसऱ्या स्थानावर पोहोचला आहे. नेपाळविरूद्धच्या खेळीनंतर त्याने 33 सामन्यांमध्ये 1101 रन्स केले आहेत. या यादीत त्याने कुमार संगकारा आणि विराट कोहली यांना मागे टाकलंय. तर या यादीमध्ये सनथ जयसूर्या पहिल्या क्रमांकावर आहे. जयसूर्याच्या नावे 1220 रन्सची नोंद आहे.
आशिया कपमध्ये सर्वाधिक रन असलेले खेळाडू
सनथ जयसूर्या – 25 सामने 1220 रन्स
रोहित शर्मा – 33 सामने 1101 रन्स
कुमार संगकारा – 24 सामने 1075 रन्स
विराट कोहली – 23 सामने 1046 रन्स
सचिन तेंडुलकर – 23 सामने 971 रन्स
सचिन तेंडुलकरलाही टाकले मागे
सर्वाधिक रन्सनंतर रोहित शर्माने क्रिकेटचा देव सचिन तेंडुलकरलाही एका विक्रमामध्ये मागे टाकले आहे. आशिया कपमध्ये भारतीय खेळाडू म्हणून रोहित सर्वाधिक 50 पेक्षा जास्त स्कोअर करण्याच्या बाबतीत पहिल्या स्थानावर पोहोचला आहे. या स्पर्धेच्या इतिहासातील रोहितचे हे १० वे अर्धशतक आहे. सचिन तेंडुलकर 9 अर्धशतकासह दुसऱ्या तर विराट कोहली 8 अर्धशतकासह तिसऱ्या स्थानावर आहे.
सर्वाधिक सिक्स रोहितच्या नावावर
नेपाळविरूद्धच्या सामन्यानंतर रोहित शर्माने अजून एक रेकॉर्ड केला आहे. यामध्ये वनडे एशिया कपमध्ये सर्वाधिक सिक्सेस लगावणारा रोहित पहिला भारतीय खेळाडू ठरला आहे. आतापर्यंत रोहितने एकूण 22 सिक्सेस लगावले आहे. यावेळी त्याने टीम इंडियाचा माजी खेळाडू सुरेश रैनाला मागे सोडले आहे. रैनाच्या नावावर एकूण 18 सिक्स आहेत.