कोलंबोच्या आर. प्रेमदासा स्टेडिअमवर भारत आणि श्रीलंका यांच्यात रंगतदार सामना सुरु आहे. या सामन्यात भारतीय कर्णधार रोहित शर्माने (Rohit Sharma) नाणेफेक जिंकून प्रथम फलंदाजी करण्याचा निर्णय घेतला. रोहित शर्मा आणि गिल यांनी आक्रमक सुरुवात केली, पण वेल्लालागे याने भारताला एकापाठोपाठ एक चार धक्के देत सामना रंगतदार केला. रोहित शर्माने श्रीलंकाविरोधात आक्रमक अर्धशतक ठोकले. या अर्धशतकाबरोबर त्याने अनेक विक्रमांना गवसणी घातली. रोहित शर्माने आशिया चषकात सर्वाधिक षटकारांचा विक्रम आपल्या नावावर केला आहे.
आफ्रिदीचा विक्रम मोडला
आशिया चषकात रोहित शर्माने सर्वाधिक षटकारांचा विक्रम केला आहे. रोहित शर्माने आशिया चषकात 28 षटकार ठोकण्याचा पराक्रम केला आहे. रोहित शर्माने पाकिस्तानच्या शाहीद आफ्रिदीचा विक्रम मोडलाय. शाहीद आफ्रिदीच्या नावावर 26 षटकार आहेत. तिसऱ्या क्रमांकवर श्रीलंकेचा सनथ जयसुर्या आहे. जयसुर्याच्या नावावर 23 षटकार आहे. या यादीत सुरेश रैना चौथ्या क्रमांकावर आहे. सुरेश रैनाने आशिया चषकात 18 षटकार ठोकले आहेत.
‘हा’ पराक्रम करणारा एकमेव खेळाडू
आशिया चषकात रोहित शर्मा सर्वाधिक धावा करणारा फलंदाज ठरलाय. याआधी हा विक्रम विराट कोहलीच्या नावावर होता. तिसऱ्या क्रमांकावर सचिन तेंडुलकरचा क्रमांक आहे. रोहित शर्माने आंतरराष्ट्रीय क्रिकेटमध्ये सलामीला आठ हजार धावा पूर्ण केल्या आहेत. वनडे, कसोटी आणि टी20 मध्ये रोहित शर्मा सलामीला फलंदाजी करतो. आशिया चषकात रोहित शर्मा याने 50 पेक्षा जास्त धावसंख्या दहा वेळा केल्या आहेत, असा पराक्रम करणारा रोहित शर्मा एकमेव फलंदाज आहे.