मुंबई : यंदाच्या आय़पीएलमध्ये (IPL) मुंबई इंडियन्सला (Mumbai Indians)आपल्या फॉर्मला साजेशी कामगिरी करता आलेली नाही. एकीकडे कर्णधार रोहित शर्माचा (Rohit Sharma) फॉर्म तर दुसरीकडे खेळाडूंची दुखापत मुंबईची डोकेदुखी ठरत आहे. मुंबईचा हुकमी एक्का जसप्रीत बुमराह (Jasprit Bumrah) दुखापतीमुळे IPLमधून बाहेर पडला. त्यामुळे जोफ्रा आर्चरवर (Jofra Archer) वेगवान गोलंदाजीची मदार होती. मात्र त्याला आपल्या फॉर्मला साजेशी कामगिरी करता आलेली नाही. त्यामुळे मुंबईने एक मोठा निर्णय घेत जोफ्रा आर्चरच्या जागी ख्रिस जॉर्डनला (Chris Jordan) आपल्या संघात दाखल करून घेतले आहे
ख्रिस जॉर्डनने 2016 मध्ये आयपीएलमध्ये पदार्पण केले. तेव्हापासून आतापर्यंत त्याला एकूण 28 सामन्यात संधी मिळाली त्यामध्ये त्याने 27 विकेट्स घेतल्या. डेथ ओव्हर्स स्पेशालिस्ट अशी जॉर्डनची ओळख आहे. मुंबई इंडियन्सने जॉर्डनला 2 कोटी रुपये मोजून संघात घेतलं आहे. आधीपासूनच जॉर्डन मुंबई इंडियन्सच्या संघासोबत होता. पण अधिकृतपणे त्याची घोषणा करण्यात आली नव्हती. आता मुंबई इंडियन्सने अधिकृत माहिती दिली आहे.
बँगलोरविरुद्ध करो वा मरोचा सामना
मुंबई इंडियन्सचा आज रॉयल चॅलेंजर्स बँगलोर (Royal Challengers Bangalore) विरुद्ध सामना आहे. वानखेडे स्टेडियमवर ही मॅच होणार आहे. दोन्ही टीम्ससाठी ही मॅच महत्वाची आहे. कारण आजच्या सामन्यात जो जिंकेल, तो पॉइंट्स टेबलमध्ये थेट तिसऱ्या नंबरवर जाईल. मुंबई इंडियन्सने आतापर्यंत 10 पैकी 5 सामने जिंकले आहेत तर 5 सामन्यात त्यांना पराभव पत्करावा लागला आहे. आजचा बँगलोर विरुद्धचा सामना मुंबई इंडियन्ससाठी ‘करो या मरो’ मुकाबला आहे.
