मुंबई : यंदाची आयपीएल स्पर्धा खूप रंगतदार होत चालली आहे. यंदाच्या सीझनमध्ये आयपीएलचे 50 सामने झाले तरी अजून कोणताच संघ प्ले ऑफसाठी पात्र ठरलेला नाही. मात्र आज प्ले ऑफसाठी पात्र ठरणारा पहिला संघ आपल्याला मिळू शकतो. आज गुजरात आणि लखनऊ यांच्यात आज दुपारी नरेंद्र मोदी आंतरराष्ट्रीय स्टेडियमवर सामना पार पडणार आहे. हा सामना जर गुजरातने जिंकला तर तो प्ले ऑफसाठी पात्र ठरणार पहिला संघ ठरेल. या सामन्यात अजून एक गोष्ट घडणार आहे जी आयपीएलच्या इतिहासात पहिल्यांदाच घडणार आहे. या सामन्यात दोन भाऊ कर्णधार म्हणून एकमेकांना भिडणार आहेत. गुजरातचा हार्दिक पंड्या आणि लखनौचा कृणाल पंड्या हे सख्खे भाऊ आज आपल्या संघासाठी भिडणार आहेत. त्यामुळे या सामन्यात कोणता भाऊ बाजी मारणार हे पाहणे महत्वाचे ठरणार आहे.
आयपीएलमध्ये गुजरातला गतवर्षी विजेतेपद मिळवून देणाऱ्या हार्दिकने भारतीय संघाचेही नेतृत्वपद भूषवलेले आहे; तर कृणालने देशांतर्गत क्रिकेटमध्ये बडोद्याच्या कर्णधारपदाची जबाबदारी काही सामन्यांत सांभाळलेली आहे, परंतु आज ते एकमेकांविरुद्ध नेतृत्व करणारे आयपीएलमधील पहिले कर्णधार ठरतील. हार्दिकचा संघ गुणतालिकेत पहिल्या स्थानी आहे तर तर लखनौचा संघ 11 गुणांसह तिसऱ्या स्थानी आहे.
लखनऊचा नियमित कर्णधार के. एल. राहुल दुखापतीमुळे संघाबाहेर गेल्याने लखनऊच्या संघाची कामगिरी थोडी डाऊन झाली आहे. जर त्यांना पहिल्या चार संघांत स्थान कायम ठेवायचे असेल तर त्यांना पुढील सगळे सामने जिंकावे लागणार आहे. के. एल. राहुल संघात नसल्यामुळे त्यांना नव्याने संघबांधणी करून पुढील सामने खेळावे लागणार आहे. दुसरीकडे गुजरातचा संघ आजचा सामना जिंकून प्ले ऑफमध्ये आपले स्थान पक्के करण्याच्या निर्धाराने उतरणार आहे. या सामन्याचे थेट प्रक्षेपण तुम्हाला स्टार स्पोर्टस्, जिओ सिनेमावर पाहता येणार आहे.
