काल आपण चकलीसाठीचे भाजणीचे पीठ कसे बनवायचे हे पाहिले सर्व जिन्नस योग्य प्रमाणात घेतले की चकली हमखास कुरकुरीत आणि काटेदार होणारच आणि लवकर मऊ देखील पडणार नाही चला तर मग पाहूयात आता भाजणीचे पीठ करून झाल्यानंतर चकली बनवण्याची कृती तत्पूर्वी पाहूयात त्यासाठी लागणारे साहित्य…
साहित्य : भाजणीचे पीठ, पाणी, तिखट, हळद, तेल, मीठ, तीळ
कृती : सर्वप्रथम एका पॅनमध्ये दोन ग्लास पाणी उकळण्यासाठी ठेवा. या पाण्यामध्ये दोन ते तीन मोठे चमचे तिखट, एक छोटा चमचा हळद, मीठ आणि पांढरे तीळ घालावे या पाण्याला चांगली उकळी येऊ द्या.
आता आपल्याला उकड घेण्याची तयारी करायची आहे. त्यासाठी हे पाणी उकळल्यानंतर यामध्ये भाजणीचे पीठ घालून चांगले हलवून घ्या. आणि पंधरा ते वीस मिनिटांसाठी झाकून थंड होण्यासाठी ठेवा.
अधिक वाचा : दिवाळी स्पेशलमध्ये पाहूयात खमंग, कुरकुरीत चकली बनवण्यासाठी भाजणीचे योग्य प्रमाण
यानंतर हे संपूर्ण मिश्रण एका बाऊलमध्ये काढून घ्या. आवश्यकतेनुसार पाण्याचा हात लावून हे मिश्रण घट्टसर भिजवून घ्या. मध्यम चांगले पीठ मळून झाल्यानंतर तेलाचा हात लावून पुन्हा दहा मिनिटांसाठी तसेच झाकून ठेवा.
तोपर्यंत कढईमध्ये तळणीसाठी तेल घ्यावे. आता हे पीठ पुन्हा एकदा चांगले मळून घेऊन लहान लहान आकाराचे गोळे तयार करा, आणि सोऱ्यामध्ये चकलीची जाळी लावून मस्त गोलाकार चकली पाडून घ्या. तेल चांगले उकळल्यानंतर गॅस मध्यम आचेवर ठेवा. आणि सर्व चकल्या खमंग अश्या तळून घ्यायच्या आहेत.
चकली तळताना लक्षात ठेवा की चकली सारखी हलवायची नाही, एकदा तेलात सोडल्यानंतर तिला जास्तीत जास्त तीन ते चार वेळा दोन्ही बाजूने खमंग तळून घ्या.