पुणे : आजकाल घटस्फोट (Divorce) झाला कि पतीला आपल्या पत्नीला पोटगी (Alimony) द्यावी लागते. मात्र कधी पत्नीने घटस्फोटादरम्यान आपल्या पत्नीला पोटगी दिल्याचे ऐकले आहे का? नाही ना… अशी दुर्मिळ गोष्ट क्वचितच पाहायला किंवा ऐकायला मिळते. अशीच एक घटना पुण्यात घडली आहे. यामध्ये एका पत्नीने पतीला कायमस्वरूपी 50 हजार रुपये पोटगी दिल्याची दुर्मिळ घटना घडली आहे.
काय आहे नेमके प्रकरण?
यामध्ये एका उच्चशिक्षित पत्नीने पतीविरोधात घटस्फोटासाठी दावा दाखल केला. यामध्ये उत्पन्नाच्या माहितीचे शपथपत्र दाखल करण्यात आले. मात्र हे शपथपत्र खोटे असल्याचे पतीच्या वकिलांनी न्यायालयाच्या निदर्शनास आणून दिले. यानंतर पत्नीने पोटगीचा हक्क सोडून दिला. याउलट पत्नीला पतीलाच पोटगी द्यावी लागली. यानंतर ऑगस्ट 2018 मध्ये दाखल केलेला दावा परस्पर संमतीने करून निकाली काढण्यात आला. सातवे सह दिवाणी न्यायाधीश एस.व्ही.फुलबांधे यांच्या न्यायालयात हा निकाल झाला.
माधव आणि माधवी (नावे बदलली आहेत) अशी या प्रकरणातील पती- पत्नीची नावे आहेत. माधवच्या वतीने अ‍ॅड. नरेंद्र बाबरे यांनी काम पाहिले. या प्रकरणातील पती-पत्नी दोघेही उच्चशिक्षित आहेत. पत्नीचे एम.टेक, तर पतीचे बी.टेक पर्यंत शिक्षण झाले आहे. ऑगस्ट 2018 मध्ये या दोघांचा विवाह झाला होता. सुरुवातीचा काही हा चांगला गेला मात्र त्यानंतर वैचारिक वादावरून दोघात खटके उडू लागले. यानंतर त्यांनी विभक्त राहण्याचा निर्णय घेतला. 10 जानेवारी 2020 पासून दोघे विभक्त राहत आहेत. 3 मार्च 2020 रोजी पत्नीने आपल्या पतीविरोधात घटस्फोटासाठी अर्ज दाखल केला. यानंतर दोघांनी एकमेकांविरोधात पोटगी मागणीचा अर्ज दाखल केला.
यानंतर या दोघांनी सर्वोच्च न्यायालयाच्या (Supreme Court) आदेशाप्रमाणे न्यायालयात संपत्ती व उत्तरदायित्व बाबतचे शपथपत्र दाखल केले. यानंतर पतीची बाजू मांडणारे वकील अ‍ॅड. नरेंद्र बाबरे यांनी युक्तिवाद केला. त्यांनी पत्नीने दिलेली माहिती खोटी असल्याचे न्यायालयाच्या निदर्शनास आणून दिले. त्यानंतर पत्नीने पोटगी मागण्याचा अधिकार कायमस्वरूपी सोडून दिला. यानंतर पत्नीलाच आपल्या पतीला 50 हजार रुपये पोटगी द्यावी लागली. यानंतर हा घटस्फोट मंजुर करण्यात आला. आता दोघांमध्ये कसलीही देवाण-घेवाण नाही आहे. तसेच दोघांनी एकामेकांविरोधात दिवाणी अथवा फौजदारी खटला दाखल न करण्याचे ठरवले आहे.
