पुणे : यंदाचा गणेशोत्सव निर्बंधमुक्त होत असताना विसर्जनासाठी शहरात विविध ठिकाणी विसर्जन हौद, टाक्या उपलब्ध केल्या जाणार आहेत. असे असताना पुन्हा एकदा फिरते विसर्जन हौदाची व्यवस्था करून १ कोटी ३५ लाख रुपयांची उधळपट्टी केली जात आहे का असा प्रश्न निर्माण होतोय.
यंदाच्या वर्षी कोणतेही कोरोना निर्बंध नसल्याने २०१९ प्रमाणे गणेश विसर्जनासाठी ४६ हौद , ३५९ लोखंडी टाक्या , १९१ मूर्ती संकलन केंद्रे अशी व्यवस्था असणार आहे. त्यातच वाहत्या पाण्यातच विसर्जन केले जाणार आहे. असे असतानाही १ कोटी ३५ लाख रुपये खर्च करून तब्बल १५० फिरते विसर्जन हौद ही भाड्याने घेतला जात आहे. त्याची निविदा प्रक्रिया दोन दिवसात सुरू होणार आहे. ऐन कोरोनाच्या काळात केवळ ६० हौद असताना आता १५० हौद कशासाठी, जनतेच्या १.३५ कोटी रुपयांची उधळपट्टी का असा प्रश्न उपस्थित होत आहे.
नागरिकांची मागणी नसतानाही व प्रशासनातील अधिकाऱ्यांचा विरोध असतानाही काही जणांसाठी ही निविदा प्रक्रिया राबविली जात असल्याचा आरोप केला जात आहे. हा निर्णय शहराच्या हिताचा नाही, त्यामुळे निविदा प्रक्रिया रद्द करावी, अशी मागणी सजक नागरिक मंचाच्यावतीने केली जात आहे. या बाबत सजक नागरिक मंचाचे अध्यक्ष विवेक वेलणकर यांनी टॉप न्यूज मराठीशी बोलताना काय माहिती दिली पाहूया…