पुणे: पुणे जिल्ह्यातील शिरूर तालुक्यातील जांबुत गावातून एक दुर्दैवी घटना समोर आली असून बिबट्याने केलेल्या हल्ल्यात 19 वर्षीय तरुणीचा दुर्दैवी मृत्यू झाला आहे ही तरुणी कला शाखेत शिकत होती.
मिळालेल्या माहितीनुसार, घराजवळील ऊसाच्या शेती जवळून तरुणी जात होती. त्याचवेळी बिबट्या शिकारीच्या शोधात दबा धरून बसला होता. त्याचवेळी त्या बिबट्याने जीवघेणा हल्ला केला. बिबट्याच्या या हल्ल्यात तरुणीचा जागीच मृत्यू झाला. या घटनेनंतर वनविभागाचे कर्मचारी घटनास्थळी दाखल झाले. पूजा नरवडे असे बिबट्याच्या हल्ल्यात मृत्यू झालेल्या १९ वर्षीय तरुणीचे नाव आहे. पूजा नरवडेच्या मृत्यूनंतर तिच्या कुटुंबाकडून आक्रोश करण्यात येत आहे. पूजाच्या मृत्यूने गावावर शोककळा पसरली आहे.
जांबुत गावात यापुर्वी बिबट्याने एका बालकाचा व दोन महिन्यापुर्वी एका युवकावर हल्ला करुन ठार केले होते. पुन्हा याच गावात 19 वर्षीय युवतीवर हल्ला करून ठार केलेली ही तिसरी घटना असून जांबुत परीसरासह बेट भागातील नागरीक प्रंचड भयभीत झाले असून वन विभागाच्या कारभारावर संतप्त झाले आहे. तसेच आमदाबाद येथे सोनवणे यांच्या शेळीवर हल्ला करून ठार केले आहे.