पुणे : शहरात तयार होणाऱ्या महाकाय कचऱ्याच्या डोंगराची डोकेदुखी येत्या दिवाळीपर्यंत बंद होणार आहे. महापालिका प्रशासन केंद्राच्या मदतीने दररोज 350 टन कचऱ्यापासून 9 मेट्रिक टन हायड्रोजनची निर्मिती (Hydrogen Production Project) करणार आहे. अशा पद्धतीनं कचऱ्यातून हायड्रोजनचा पहिला प्रकल्प पुण्यात साकारण्यात येणार आहे.
महापालिकेत घनकचरा व्यवस्थापन करणारा मोठा विभाग आहे. दररोज सुमारे 500 टनापेक्षा जास्त घनकचरा तयार होतो. या कचऱ्याचे वर्गीकरण रोज होत असते. मात्र त्यापासून इंधननिर्मिती साठी पैसा उभारायचा कसा हा प्रश्न होता. तो आता सुटला असून केंद्र सरकारच्या मदतीनं हडपसर (Hadapsar) येथे कचऱ्यापासून (Garbage) हायड्रोजन निर्मितीचा प्रकल्प उभारण्यात येणार आहे. त्यामुळे पुण्यातील उद्योजकांना आता चीनकडून येणाऱ्या गॅस पुरवठ्याची गरज भासणार नाही. या प्रकल्पाचे 70 टक्के काम पूर्ण झाले असून लोकसहभागातून हा प्रकल्प चालवला जाणार आहे. येत्या दिवाळीपर्यंत हा प्रकल्प पूर्णपणे तयार होऊन हायड्रोजन निर्मितीच्या प्रत्यक्ष कामाला सुरुवात होणार आहे.
दिल्ली (Delhi) मधील एक खासगी कंपनी हा प्रकल्प उभारण्याच काम करत असून, दिवाळीत हा प्रकल्प सुरू होण्याची शक्यता आहे.या प्रोजेक्टमुळे कार्बन उत्सर्जन देखील कमी होण्यास हातभार लागणार असल्यान हा पायलट प्रोजेक्ट म्हणून यशस्वी झाला तर राज्यात सर्वत्र अशाच प्रकारचे हायड्रोजन प्रकल्प उभारण्याचे नियोजन करण्यात आले आहे.
