माणुसकीला काळीमा फासणारी घटना पुण्यातील ससून रुग्णालयात घडली. बेवारस रुग्णाला एका डॉक्टर आणि त्याच्या साथीदाराने निर्जन स्थळी नेऊन सोडले. यानंतर सामाजिक कार्यकर्त्यांनी पोलिसांना बोलावून या रुग्णाला पुन्हा ससून रुग्णालयात उपचारासाठी दाखल केले. दरम्यान या सगळ्या घटनेचा घटनास्थळावरचा व्हिडिओ सोशल मीडियावर व्हायरल केला. यानंतर पुन्हा एकदा ससून प्रशासनावर सर्व स्तरातून टीका होत आहे. या प्रकरणी येरवडा पोलीस ठाण्यात गुन्हा दाखल करण्यात आला असून संबंधित डॉक्टरचे निलंबन सुद्धा करण्यात आले आहे. या सगळ्यावर ससूनचे अधिष्ठाता एकनाथ पवार यांनी स्पष्टीकरण देताना हा रुग्ण स्वतः ‘मला घरी नेऊन सोडा’ असे म्हणत असल्याचे स्पष्टीकरण दिले आहे.
एकनाथ पवार म्हणाले, ’16 जून रोजी अपघात झालेला हा 32 वर्षीय रुग्ण ससून रुग्णालयात दाखल झाला होता. त्याच्या दोन्ही पायांवरून बस गेली होती. ससून मध्ये त्याच्यावर दोन वेळा शस्त्रक्रिया करण्यात आली. प्लास्टिक सर्जरी देखील केली. गेल्या काही दिवसांपासून रुग्णाच्या प्रकृतीत सुधारणा होत होती. तेव्हापासून हा रुग्ण मला माझ्या घरी नेऊन सोडा असं डॉक्टरांना म्हणत होता. या सगळ्या प्रकरणांमध्ये ऑर्थोपेडिक्स विभागातील निवासी डॉक्टर डॉ. आदिनाथ यांनी या रुग्णाला नेऊन सोडल्याची माहिती आम्हाला मिळाली आहे. आदिनाथ यांचं निलंबन करण्यात आलं आहे. या प्रकरणाची सखोल सविस्तर चौकशी करण्यात येईल. त्यांच्यावर कठोर कारवाई केली जाईल.’
अधिष्ठाता एकनाथ पवार यांना बेवारस रुग्ण गायब होत असल्याची कल्पना नाही. मात्र या प्रकरणांमध्ये सखोल चौकशी केली जाणार असल्याची माहिती त्यांनी दिली. या प्रकरणी संबंधित डॉक्टर विरोधात गुन्हा दाखल करण्यात आला आहे. त्यामुळे या प्रकरणात आणखी कोण कोण दोषी आढळते, या आधीही ससून मध्ये असे प्रकार घडले आहेत का ? या सगळ्याची चौकशी आणि तपास होणे गरजेचे झाले आहे.
