पुणे : गायिका मंजुश्री ओक (Manjushree Oak) यांनी देशातील विविधतेतील एकात्मतेचे दर्शन घडविण्यासाठी भारतातील 121 भाषा, बोलीभाषा आणि उपभाषांमध्ये सलग साडेतेरा तास गाण्यांचे सादरीकरण करून जागतिक विक्रम आपल्या नावावर केला आहे. ओक यांनी सादर केलेल्या ‘अमृतवाणी – अनेकता मैं एकता’ या कार्यक्रमाची ‘गिनेस बुक ऑफ वर्ल्ड रेकॉर्डस्’मध्ये नोंद करण्यात आली आहे. यशवंतराव चव्हाण नाट्यगृहामध्ये (Yashwantrao Chavan Theatre) हा कार्यक्रम आयोजित करण्यात आला होता.
गायिका मंजुश्री ओक यांनी यापूर्वी 2017 आणि 2018 अशी सलग दोन वर्षे ‘इंडिया बुक ऑफ रेकॉर्डस्’ (India Book of Records) व ‘एशिया बुक ऑफ रेकॉर्डस्’मध्ये (Asia Book of Records) प्रत्येकी दोन विक्रम नोंदविले आहेत. या विक्रमाबद्दल विचारले असता ‘लहानपणापासून अभिजात भारतीय शास्त्रीय संगीताचे शिक्षण घेत असताना संगीत क्षेत्रातील प्रयत्नांद्वारे देशासाठी काही तरी योगदान द्यावे, हा विचार मनात होता. याच दृष्टीने प्रयत्न करीत असताना ‘श्री यशलक्ष्मी आर्ट’तर्फे आणि पद्मनाभ ठकार यांच्या सहकार्याने ‘अमृतवाणी – अनेकता मैं एकता’ हा कार्यक्रम केला,’ असे ओक यांनी सांगितले.
तसेच गाण्यांमध्ये पारंपरिक गीते, लोकगीते, भक्तिगीते, भावगीते, अभंग, देशभक्तिपर गीते; तसेच लावणीला सामावून घेतले. देशातील ही विविधता भाषा आणि गाण्यांच्या स्वरूपात जगापर्यंत पोहोचावी, या उद्देशाने मी हा विक्रम करण्याचा प्रयत्न केला आणि तो यशस्वी ठरला,’ अशी भावना ओक यांनी यावेळी व्यक्त केली.