पुणे- पुण्यातील गँगस्टर शरद मोहोळ आणि विठ्ठल शेलार यांच्यात पुन्हा एकदा व्यावसायिक वर्चस्ववादातून टोळीयुद्धाचा भडका उडाला आहे. जानेवारी महिन्यात घडलेल्या घटनेचे सीसीटीव्ही फुटेज समोर आलं असून त्यामध्ये शरद मोहोळ याच्या टोळक्याने म्हाळुंगे इथल्या राधा चौकात राडा घालत असल्याचे दिसून येत आहे.
व्यावसायिक वादातून पिस्तुलाचा धाक दाखवून धमकी दिली या कारणावरून शरद मोहोळच्या साथीदारांनी विठ्ठल शेलारवर हल्ला करण्याचा प्रयत्न केला. यामध्ये शेलार पळून जाण्यात यशस्वी ठरला. मात्र मोहोळच्या साथीदारांनी येणाऱ्या जाणाऱ्या गाड्यांवर दगडफेक केली तसेच कुंड्या फेकून दहशत माजवली. ही घटना ८ जानेवारी रोजी मध्यरात्री घडली होती. हिंजवडी पोलीस घटनास्थळी पोहोचेपर्यंत टोळके तिथून पसार झाले होते. या प्रकरणी एक महिन्यानंतर ९ फेब्रुवारी रोजी हिंजवडी पोलिसांनी गुन्हा दाखल केला आहे.
कोण आहे शरद मोहोळ आणि विठ्ठल शेलार ?
शरद मोहोळ
-पुण्यातील कुख्यात गुंड म्हणून मोहोळची ओळख
– सरपंचाचं अपहरण करुन खंडणी उकळल्या प्रकरणी पोलिसांनी शरद मोहोळ याला अटक केली होती.
– मोहोळ व आलोक भालेरावला येरवडा कारागृहातील अंडा सेलमध्ये ठेवण्यात आलं होतं
– त्यावेळी त्यांनी दहशतवादी कातिल सिद्दीकी याचा नाडीने गळा आवळून खून केला होता
– या खटल्यातून त्यांची पुराव्या अभावी निर्दोष मुक्तता करण्यात आली
विठ्ठल शेलार
-विठ्ठल शेलार मुळशी तालुक्यातील गुंड
– शेलार विरुद्ध खून, अपहरण, दरोड्याची तयारी आदी गुन्हे दाखल
– शेलार विरुद्ध मोक्का अंतर्गत कारवाई करण्यात आली आहे