IAS पूजा खेडकरच्या वडिलांना दिलासा! दिलीप खेडकर यांचा अटकपूर्व जामीन सत्र न्यायालयाकडून मंजूर
वादग्रस्त आयएएस अधिकारी पूजा खेडकर हिचे आई- वडील म्हणजेच दिलीप खेडकर आणि मनोरमा खेडकर हे दोघेही काही दिवसांपासून फरार होते. मुळशीतील शेतकऱ्यांना पिस्तुलाचा धाक दाखवत धमकावल्या प्रकरणी त्यांच्या विरोधात गुन्हा दाखल करण्यात आला होता. अखेर मनोरमा खेडकर यांना पुणे पोलिसांनी महाड मधून अटक केली. त्यांना 20 तारखेपर्यंतची पोलीस कोठडी देखील सुनावण्यात आली आहे. मात्र त्याचवेळी पुणे पोलिसांकडून पूजाचे वडील दिलीप खेडकर यांचा देखील शोध सुरू होता. त्यामुळे अटके पासून वाचण्यासाठी दिलीप खेडकर यांनी अटकपूर्व जामीनासाठी अर्ज दाखल केला होता. आणि अखेर पुणे सत्र न्यायालयाने दिलीप खेडकर यांचा 25 जुलै पर्यंत अटकपूर्व मंजूर केला आहे.
पूजा खेडकर हिच्या आई-वडिलांचे अनेक प्रताप उघड झाले आहेत. अनेक प्रकरणांची चौकशी आणि तपास सुरू असल्याकारणाने पूजाच्या आई-वडिलांची सखोल चौकशी करणे पोलिसांच्या दृष्टिकोनातून आवश्यक आहे. त्यामुळे मनोरमा खेडकर आणि दिलीप खेडकर यांचा शोध पुणे पोलिसांकडून सुरू होता. दरम्यान मनोरमा खेडकर या आता पोलिसांच्या अटकेत असून दिलीप खेडकर हे मात्र पोलिसांच्या हाती लागलेले नाहीत. दरम्यान आता त्यांना अटकपूर्व जामीन मंजूर झाल्यामुळे पुणे पोलिसांच्या तपासात नवी अडचण निर्माण झाली आहे..