पुणे : पुणे (Pune News) गणेश विसर्जन मिरवणूक शुक्रवारी दुपारी तीन वाजेच्या सुमारास संपली. गणपती बाप्पा मोरया…पुढच्या वर्षी लवकर या…या जयघोषात पुण्यातील शेवटच्या गणेश मंडळाच्या गणरायाचे विसर्जन झाले. यंदाच्या विसर्जन मिरवणुकीत ढोल, ताशांचे पथकाबरोबर भव्य दिव्य देखावे भाविकांना पाहण्यास मिळाले. यंदा 2905 गणेश मंडळांनी गणेश विसर्जन मिरवणुकीत सहभाग नोंदवला.तसेच 285701 घरगुती गणपतींचे विसर्जन करण्यात आले.
पुणे शहरातील विसर्जन मिरवणूक गुरुवारी सकाळी 10.30 वाजता सुरु झाली होती. पुणे शहरातील प्रमुख गणेश मंडळांनी लक्ष्मी रस्ता, कुमठेकर रस्ता, टिळक रस्त्यावरून मिरवणूक नेली. मिरवणुकीत ढोल, ताशे, लेझिम पथक, सनई-चौघडा असा लवाजमा होता. पुण्यातील गणेश विसर्जन मिरवणूक यंदा तब्बल 28 तास 40 मिनिटे चालली. सकाळी 10:30 वाजता विसर्जन मिरवणूक सुरू झाली होती. दुपारी 3:10 वाजता मिरवणूक संपली.