पुणे : पुणे शहरात 18 जुलै रोजी पुणे पोलिसांनी दोन दशतवाद्यांना अटक (Pune Isis Module) केली होती. या दोन्ही दहशतवाद्यांचा संबंध इसिसशी असल्याचे तपासातून उघड झाले होते. पुणे शहरात उघड झालेल्या या इसिस मॉड्यूलमुळे मोठी खळबळ उडाली होती. राष्ट्रीय तपास संस्थेने (NIA) या प्रकरणाची संवेदनशीलता लक्षात घेत तपास सुरु केला. आता एनआयएकडून या प्रकरणातील सर्व आरोपींच्या मुसक्या आवरण्यासाठी जोरदार कारवाई केली जात आहे.
4 वॉटेंड आरोपीवर प्रत्येकी तीन लाखांचे बक्षिस
पुणे इसिस मॉड्युल प्रकरणातील चार वॉटेंड आरोपींवर प्रत्येकी तीन लाखांचे बक्षिस जाहीर करण्यात आले आहे. आरोपींना पकडून देणाऱ्यांना हे बक्षिस दिले जाणार आहे. महमद शहनवाज शफीज उम्मा आलम अब्दुल, रिझवान अब्दुल हाजी अली, अब्दुल शेख फय्याज बायपरवाला, ताला लिवाकत खान अशी आरोपींची नावे आहेत. या आरोपींची माहिती देणाऱ्याचे नाव गुप्त ठेवण्यात येईल असेदेखील जाहीर करण्यात आले आहे. दहशतवादी संघटनेचा प्रचार आणि प्रसार केल्याप्रकरणी हे चार आरोपी एनआयएच्या वॉटेंडच्या यादीत आहे.
7 आरोपींना अटक
NIA ने ISIS पुणे मॉड्यूल प्रकरणात आतापर्यंत सात आरोपींना अटक केली आहे. हे सर्व आरोपी पुणे शहरातील कोंढवामध्ये एका घरात काम करत होते. याठिकाणी त्यांनी आयईडी बनवले होते. तसेच बॉम्ब बनवण्याची कार्यशाळाही घेतली होती. तसेच सातारा जंगलात जाऊन बॉम्बची चाचणीदेखील घेतली होती.