पुणे – आरोग्य भरती परीक्षा घोटाळा प्रकरणातील आरोपीच्या विरोधात पुणे पोलिसांच्या सायबर गुन्हे शाखेनं तब्बल 3 हजार 800 पानांचे दोषारोप पत्र शिवाजीनगर न्यायालयात दाखल केले आहे. या प्रकरणी अटक करण्यात आलेल्या 20 आरोपींच्या विरोधात हे आरोपपत्र दाखल करण्यात आले आहे.
आरोग्य भरतीतील गट क आणि गट ड च्या परीक्षेत घोटाळा झाल्याचे समोर आले होते. त्यानंतर या घोटाळ्यातील आरोपींचा पोलीस शोध घेत पोलिसांनी 20 जणांना अटक केली आहे. यामध्ये आरोग्य विभागाचे सहसंचालक डॉ. महेश बोटले आणि प्रशांत बडगिरे मुख्य आरोपी आहे. या दोन्ही पेपरफुटीमध्ये पुणे सायबर पोलिसांकडून वडझरीचे सानप बंधू यांचा शोध सुरु आहे. आतापर्यंत पोलिसांनी केवळ संजय शाहुराव सानप यांना जेरबंद केलं आहे.
या प्रकरणात काही दिवसांपूर्वीच आणखी एका म्होरक्याला पुणे सायबर पोलिसांनी अटक केली आहे. अतुल प्रभाकर राख ( रा.थेरला ह.मु. अंकुशनगर कपिल मुनी मंदिराच्या पाठीमागे ) असे अटक केलेल्या आरोपीचे नाव आहे. आरोपी अतुल हा अटक केलेला आरोपी संजय सानपाचा मेहुणा आहे.
पेपरफुटी प्रकरणात पुणे सायबर पोलीसांना हवा असलेला मुख्य आरोपी जीवन सानप याच्या सर्व अ‍ॅक्टीव्हीटी अतुल राख करायचा अशी माहिती पोलिसांनी दिली आहे. त्याच्याकडून या प्रकरणातील अनेक गोष्टींचा उलगडा होही अशी आशा पोलिसांना आहे.
