पुणे : पुणेमध्ये बसचा ब्रेक फेल झाल्याने शहरात भीषण अपघात झाला आहे. या अपघातात दोन जणांचा जागीच मृत्यू झाला आहे तर तीन जण गंभीर जखमी झाले आहेत. पुणे शहरात एन आय बी एम उंड्री रोडवर (NIBM Undry Road) हा अपघात (Accident) झाला आहे. एन आय बी एम उंड्री रोडवर उताराला अचानक एका बसचा ब्रेक फेल (brake failure) झाला. त्यामुळं या बसने दुचाकी, रिक्षा आणि बीएमडब्ल्यू कारसह अनेक वाहनांना धडक दिली. या अपघातातील जखमींना जवळच्या खासगी रुग्णालयात दाखल करण्यात आले आहे.
काय घडले नेमके ?
कोंढवा परिसरातील असणाऱ्या एनआयबीएम रस्त्यावर काल सायंकाळच्या सुमारास खासगी बस चालली होती. मात्र पुढे जात असताना या बसचा अचानक ब्रेक फेल झाला. त्यामुळे या बसने समोर असणाऱ्या वाहनांना जोरात धडक दिली. त्यामुळे ही वाहने एकमेकांना अचानकपणे जोरात धडकली. आणि एकमेकांवर जोरात आदळली. या अपघातात दोघांचा जागेवरच मृत्यू झाला अन्य चार जखमींना रुग्णालयात दाखल करण्यात आले आहे.
या अपघातामुळे रस्त्यावर मोठ्या प्रमाणात वाहतूक कोंडी (Traffic congestion0 झाली होती. या अपघाताची माहिती मिळताच पोलीस तातडीने घटनास्थळी दाखल झाले आणि त्यांनी वाहतूक सुरळीत केली. वर्दळीच्या ठिकाणी हा अपघात झाल्याने एकच गोंधळ उडाला होता. या अपघातात वाहनांचे मोठ्या प्रमाणात नुकसान झाले आहे.
