पुणे : पुणे येथील तळेगाव या ठिकाणी काही दिवसांपूर्वी जनसेवा विकास समितीचे अध्यक्ष किशोर आवारे (kishore aware) यांच्यावर गोळीबार आणि वार करण्यात आले होते. यामुळे त्यांचा जागीच मृत्यू झाला होता. यानंतर पोलिसांनी या प्रकरणी तातडीने कारवाई करून गौरव भानू खळदे (रा. तळेगाव)(Gaurav Bhanu Khalde) याला अटक केली आहे. त्याने या प्रकरणी अनेक धक्कादायक खुलासे केले आहेत.
माजी नगरसेवक भानू खळदे (Bhanu Khalde) आणि किशोर आवारे यांचा जुन्या नगरपरिषद इमारतीच्या आवारात वाद झाला होता. त्यावेळी आवारे यांनी भानू खळदे यांच्या कानशिलात लगावली होती. त्याचा राग मुलगा गौरव याच्या मनात होता. त्यातूनच त्याने इतर आरोपींना किशोर आवारे यांच्या हत्येची सुपारी दिली असल्याची धक्कादायक माहिती समोर आली आहे.
या प्रकरणी पोलिसांनी गौरव भानू खळदे याच्या अगोदर शाम अरुण निगडकर (वय 46, रा. डोळसनाथ आळी, तळेगाव दाभाडे), प्रवीण संभाजी धोत्रे (वय 32), आदेश विठ्ठल धोत्रे (वय 28, रा. नाणे, ता. मावळ), संदीप उर्फ नन्या विठ्ठल मोरे (वय 32, रा. आकुर्डी), श्रीनिवास उर्फ सिनु व्यंकटस्वामी शिडगळ (रा. देहूरोड) यांना अटक केली होती. या सगळ्या आरोपींना वडगाव मावळ न्यायालयात (Vadgaon Maval Court) हजर करण्यात आले. यावेळी न्यायालयाने आरोपींना 20 मे पर्यंत पोलीस कोठडी सुनावली.