पुणे- कर्वे रस्त्यावर बांधण्यात आलेल्या दुमजली उडडाणपुलामुळे वाहतुकीची कोंडीचा प्रश्न सुटेल अशी अपेक्षा होती. मात्र येथील वाहतुकीचा प्रश्न जैसे थे राहिला आहे. म्हणूनच कर्वे रस्त्यावरील उड्डाणपुलामुळे होणारी कोंडी फोडण्यासाठी आता काही प्रायोगिक बदल केले जाणार आहेत.
१३ मार्चला या उड्डाणपुलाचे उदघाटन झाले. मात्र वाहतुकीचा प्रश्न सुटलेला नाही. या पार्श्वभूमीवर सोमवारी महापालिकेचे आयुक्त विक्रमकुमार यांनी आढावा बैठक घेतली. या बैठकीत उड्डाणपूल परिसरातील वाहतूक कोंडीबद्दल; तसेच त्यावरील उपाययोजनांबद्दल सविस्तर चर्चा करण्यात आली. त्यानंतर काही प्रायोगिक बदल करण्याचे निश्चित करण्यात आले. हे बदल पुढील काही दिवसांत अमलात येतील आणि दहा ते पंधरा दिवसांसाठी लागू केले जातील. त्याचे परिणाम पाहून पुढे या बदलांना अंतिम स्वरूप दिले जाईल, असे या वेळी स्पष्ट करण्यात आले.
या बैठकीला माजी महापौर मुरलीधर मोहोळ, ‘पीएमपी’चे अध्यक्ष लक्ष्मीनारायण मिश्रा, महापालिका, महामेट्रो; तसेच वाहतूक पोलिसांचे प्रतिनिधी उपस्थित होते.
असे असतील प्रायोगिक बदल…
– खिलारेवाडी आणि मेहेंदळे गॅरेज चौकाकडून आलेल्या चारचाकी वाहनांना शंकरराव जोशी मार्ग (हॉटेल निसर्ग) कर्वे रस्त्याकडे बंदी असेल. या वाहनांना नळस्टॉप चौकात येऊनच कर्वे रस्त्याकडे जावे लागेल. या रस्त्यावर केवळ दुचाकींनाच प्रवेश दिला जाईल.
– एसएनडीटी येथील एसटी महामंडळ आणि पीएमपीचा बसथांबा कर्वे रस्त्यावर दशभुजा गणपतीजवळ स्थलांतर केला जाईल. रिक्षांनाही येथे थांबण्यास बंदी असेल.
– उड्डाणपुलावरून उतरताना पौडफाट्याच्या उड्डाणपुलाकडे जाण्यासाठी स्वतंत्र मार्गिका (बॅरिकेडिंग लेन) असेल. तर अभिनव (नळस्टॉप) चौकातून कर्वे रस्त्याने आलेल्या वाहनांना डाव्या बाजूने पौड रस्त्यावरील स्वातंत्र्यवीर सावरकर उड्डाणपुलावर जाता येईल.
– व्यापाऱ्यांच्या मागणीनुसार उड्डाणपुलाखाली ‘पे अँड पार्किंग’ सुविधा उपलब्ध केली जाईल.
– उड्डाणपुलावरून कर्वे रस्त्याकडे आल्यानंतर ‘रेस्कॉन’ कंपनीकडे वळण्यास वाहनांना बंदी असेल.
