पुणे : ज्येष्ठ गणितज्ञ, शास्त्रज्ञ आणि लेखिका डॉ. मंगला नारळीकर (Dr Mangala Narlikar) यांचे आज अल्पशा आजाराने निधन झाले आहे. वयाच्या 80 व्या वर्षी त्यांनी अखेरचा श्वास घेतला.पुण्यातील राहत्या घरी डॉ. मंगला नारळीकर यांनी आपला अखेरचा श्वास घेतला. त्या अंतराळशास्त्रज्ञ जयंत नारळीकर यांच्या पत्नी होत्या. डॉ. मंगला नारळीकर यांना कॅन्सर झाला होता. ज्येष्ठ खगोलशास्त्रज्ञ डॉ. जयंत नारळीकर यांना त्यांच्या संपूर्ण कारकिर्दीत पत्नी आणि सहकारी म्हणून मंगलाताईं यांनी खंबीरपणे साथ दिली होती.
डॉ. मंगला नारळीकर यांनी अनेक इंग्रजी व मराठी पुस्तके लिहिलेली आहेत. शालेय विद्यार्थ्यांसाठीचे गणिताच्या सोप्या वाटा, नभात हसरे तारे, पहिलेले देश, भेटलेली माणसं हे प्रवासवर्णन यासारखी त्यांची पुस्तकं विशेष गाजली. मंगला नारळीकर यांनी मुंबई विद्यापीठतून 1962 साली बीए ही पदवी घेतली होती. त्यानंतर 1964 साली त्या एम.ए. (गणित) झाल्या. या परीक्षेत त्यावेळी त्या विद्यापीठातून पहिल्या आल्या होत्या. त्यांना तत्कालीन कुलपतींकडून सुवर्णपदक सुद्धा मिळाले होते.
यानंतर त्यांनी1964 ते 1966 या काळात इन्स्टिट्यूट ऑफ फंडामेन्टल रिसर्च या मुंबईच्या संस्थेच्या गणित विद्यालयात आधी सहायक संशोधक आणि नंतर सहयोगी संशोधक म्हणून काम केले. 1967 ते 1969 मध्ये केंब्रिज विद्यापीठात पदवीपूर्व अभ्यासक्रमाच्या शाळेत त्यांनी गणिताचे अध्यापन केले. 1965 मध्ये मंगला राजवाडे यांचा विवाह गणिती आणि अंतराळशास्त्रज्ञ जयंत नारळीकर यांच्याशी झाला.
