पुणे : पुण्याचे अतिरिक्त विभागीय आयुक्त डॉ. अनिल रामोड (Dr. Anil Ramod) व त्यांच्या कुटुंबीयांच्या नावाने असलेल्या 17 बँक खात्यांमध्ये 47 लाखापेक्षा अधिक रक्कम असल्याचे समोर आले आहे. डॉ. रामोड यांची सखोल चौकशी करण्यात येत आहे. मात्र ते तपासास सहकार्य करत नसल्याची माहिती CBI ने न्यायालयास दिली आहे. डॉ. रामोड यांना मंगळवारी सीबीआय (CBI) न्यायालयात हजर करण्यात आले होते. त्यांच्या कोठडीसाठी सीबीआयने न्यायालयात दाखल केलेल्या रिमांड रिपोर्टमध्ये सीबीआयने ही माहिती दिली.
रामोड कुटुंबीयांच्या नावे बँकेत असलेली रक्कम कुठून आली? त्यांची आणखी कुठे बेकायदेशीर मालमत्ता व रक्कम आहे का? याची सीबीआयकडून चौकशी सुरु आहे. आरोपीचे कार्यालय व इतर ठिकाणाहून पुरावे जमा करायचे असल्याने त्याला न्यायालयीन कोठडी देण्याची विनंती सीबीआयच्या तपास अधिकाऱ्यांनी न्यायालयाकडे केली आहे. यानंतर न्यायालायने ही विनंती मान्य करून सीबीआयचे विशेष न्यायाधीश एस. एस. वाघमारे यांनी रामोड यांना 27 जूनपर्यंत न्यायालयीन कोठडी सुनावली आहे. त्यामुळे रामोड याची रवानगी आता येरवडा कारागृहात करण्यात आली आहे.