मुंबई : पुण्यातील भोसरी येथील भूखंड घोटाळा प्रकरणी राष्ट्रवादी काँग्रेसचे ज्येष्ठ नेते एकनाथ खडसे (Eknath Khadse) यांना हायकोर्टाने दणका दिला आहे. पुण्यातील भोसरी येथील या भूखंड घोटाळा प्रकरणी आज मुंबई उच्च न्यायालयाने खडसे यांची याचिका फेटाळली आहे. या याचिकेत एसीबीने दाखल केलेला गुन्हा रद्द करा, अशी मागणी करण्यात आली होती.
पुण्यातील भोसरी येथील भूखंड घोटाळ्यात एकनाथ खडसे आणि त्यांच्या पत्नी मंदाकिनी खडसे यांच्याविरोधात ACB नं गुन्हा दाखल केला आहे. या गुन्ह्यात कारवाई न करण्याचा दिलासा हायकोर्टाने यापूर्वी दिला होता.एकनाथ खडसे, पत्नी मंदाकिनी, जावई गिरीश चौधरी यावर आक्षेप घेण्यात आले आहे. यादरम्यान ACB नं दाखल केलेला गुन्हा रद्द करा, अशी मागणी करणारी याचिका एकनाथ खडसे यांनी मुंबई हायकोर्टात दाखल केली होती. मात्र, खडसे यांची ही याचिका हायकोर्टाकडून फेटाळण्यात आली आहे. यामुळे आता खडसे यांच्या अडचणीत वाढ होण्याची शक्यता आहे.
काय आहे भोसरी भूखंड घोटाळा?
भोसरीतील एमआयडीसी भूखंड घोटाळा प्रकरणात आरोप असा होता की, एकनाथ खडसे यांच्या पत्नी मंदाकिनी खडसे आणि जावई गिरीश चौधरी यांनी 2016 मध्ये भोसरीतील एमआयडीसीमध्ये एक जमीन खरेदी केली होती. 3.75 कोटी रूपयांना ही जमीन खरेदी केली होती. या व्यवहाराची नोंदणी निबंधकांच्या कार्यालयात रीतसर करण्यात आली. मात्र या जमीनीचा मूळ बाजारभाव 31 कोटी रूपये असताना गिरीश यांनी तो फक्त तीन कोटी रूपयांना विकत घेतला. हा भूखंड एमआयडीसीच्या मालकीचा असल्याने तो इतका कमी किमतीत कसा काय विकत घेतला. यांसह अनेक मुद्यावरून ईडीने तपास सुरू केला.