पुणे : मागच्या काही दिवसांपासून राज्याच्या राजकारणाने एक वेगळे वळण घेतले आहे. अशातच आता काही दिवसांवर निवडणूका येऊन ठेपल्या आहेत. त्यामुळे आता निवडणुकीच्या पार्श्वभूमीवर पक्षांतराचे वारे वाहायला सुरुवात झाली आहे. येणाऱ्या लोकसभा निवडणुकीच्या तोंडावर भाजपने राष्ट्रवादी काँग्रेसला मोठा धक्का दिला आहे. राष्ट्रवादी काँग्रेसचे पुरंदर हवेलीचे माजी आमदार अशोक टेकवडे हे भाजपमध्ये (BJP) प्रवेश करणार आहेत. शरद पवार (Sharad Pawar) यांच्यासाठी हा मोठा धक्का मानला जात आहे.
अशोक टेकवडे (Ashok Tekwade) उद्या (मंगळवारी) भाजप प्रदेशाध्यक्ष चंद्रशेखर बावनकुळे (BJP State President Chandrasekhar Bawankule) यांच्या उपस्थितीमध्ये ते पक्षात प्रवेश करणार आहेत. अशोक टेकवडे हे 2004 ते 2009 दरम्यान पुरंदर हवेलीचे आमदार राहिले आहेत. बारामती काबीज करण्याच्या दृष्टिकोनातून भाजपने या हालचाली सुरु केल्या आहेत. येत्या लोकसभा निवडणुकीच्या दृष्टीने राष्ट्रवादीसाठी हा मोठा धक्का मानला जात आहे.
अशोक टेकवडे गेल्या महिन्यांपासून राष्ट्रवादीत (NCP) नाराज होते. त्यामुळे ते राष्ट्रवादीत फार काळ राहणार नाही अशी पुरंदरमध्ये दबक्या आवाजात चर्चा होती.अखेर या नाराजीतूनच त्यांनी राष्ट्रवादीला सोडचिठ्ठी देण्याचा निर्णय घेतला आहे. त्यामुळे अशोक टेकवडे यांच्या भाजप प्रवेशामुळे भाजपची पुरंदरमध्ये (Purandar) ताकद वाढण्यास मदत मिळणार आहे. त्यामुळे राष्ट्रवादीची डोकेदुखी वाढणार हे मात्र नक्की.
