पुणे- भांडारकर प्राच्यविद्या संशोधन संस्थेमध्ये नव्याने तयार करण्यात आलेल्या “समवसरण” या ॲम्फी थिएटरचे उद्घाटन गुरुवारी केंद्रीय रस्ते वाहतूक आणि महामार्ग मंत्री नितीन गडकरी यांच्या हस्ते करण्यात आले.
यावेळी संस्थेचे अध्यक्ष व ज्येष्ठ उद्योगपती अभय फिरोदिया, आमदार सिद्धार्थ शिरोळे, माजी खासदार प्रदीप रावत, कार्याध्यक्ष भूपाल पटवर्धन, विश्वस्त राहुल सोलापूरकर, संजय पवार, सदानंद फडके व सुधीर वैशंपायन उपस्थित होते.
यावेळी गडकरी म्हणाले की, भारतीय संस्कृतीला जोडणारे अनेक धागे आहेत. उपासना पद्धती वेगळी असली तरी भक्ती एकच आहे, त्यामुळे विविधता असूनही आपण एक आहोत. आपण गरीब असलो तरी आपली कुटुंब व्यवस्था मूल्याधिष्ठित आहे. आपल्या धर्म, जातींमध्ये निष्कारण गैरसमज आहेत, ते दूर व्हायला हवेत. आपण त्यासाठी सर्वांनी प्रयत्न करायला हवेत. चांगली कामे होत आहेत, त्यासाठी लोकाश्रय मिळायला हवा.
यावेळी फिरोदिया यांनी, अशा प्रकारच्या ॲम्फी थिएटरच्या निर्मितीमागची पार्श्वभूमी आणि उद्देश याबद्दल माहिती दिली. या अ‍ॅम्फी थिएटरला ‘समवसरण’ दिलेल्या नावाबद्दल त्यांनी सांगितले की, साम म्हणजे समान आणि अवसर म्हणजे संधी, म्हणजेच समान संधी. सर्वांना जोडणारी भारतीय संस्कृती आहे. त्यातील मूल्यांकडे आपण पाहिले पाहिजे. आपल्या परंपरा आणि जीवन पद्धती यांचा विसर पडलाय, त्या आता पुन्हा सुरू करण्याची गरज आहे, असे फिरोदिया म्हणाले.
