भाजपा नेते गिरीश बापट यांच्या निधनानंतर पुणे लोकसभेची जागा रिक्त झाली आहे. या जागेवर आता पोटनिवडणूक होण्याची शक्यता आहे. अशातच काँग्रेस नेते विजय वडेट्टीवार यांनी पुणे लोकसभेची जागा महाविकास आघाडी लढणार असं विधान करून वाद निर्माण केला आहे. त्यांच्या या विधानावर अजित पवारांनी वडेट्टीवार यांना चांगलेच सुनावले आहे.
पुणे लोकसभा मतदारसंघाचे खासदार आणि भाजपचे ज्येष्ठ नेते गिरीश बापट यांचे नुकतेच निधन झाले. गिरीश बापट अजातशत्रू होते. पुण्यातील सर्वपक्षीय नेत्यांशी त्यांचे मित्रत्वाचे संबंध होते. त्यांच्या निधनामुळे पुणे लोकसभा मतदारसंघाची जागा रिक्त झाली आहे. लोकसभा निवडणुकीसाठी अद्याप वर्षभराचा कालावधी शिल्लक आहे. त्यामुळे पुणे लोकसभा मतदारसंघात पोटनिवडणूक लागण्याची शक्यता आहे. या जागेवर काँग्रेस पक्षाचे नेते विजय वडेट्टीवार यांनी आत्तापासूनच दावा सांगायला सुरुवात केली आहे.
गिरीश बापट यांचे निधन झाले त्यादिवशी अजित पवार नाशिकमध्ये होते. त्यामुळे ते बापटांच्या अंत्यविधीला येऊ शकले नव्हते. आज अजित पवार यांनी गिरीश बापट यांच्या शनिवारी पेठेतील घरी जाऊन त्यांच्या कुटुंबीयांचे सांत्वन केले. विजय वडेट्टीवार यांच्या वक्तव्यावरून अजित पवार यांना प्रश्न विचारला असता त्यांनी वडेट्टीवार यांना चांगलेच सुनावले.
अजित पवार म्हणाले,” हे बघा, लगेच कुणी गुडघ्याला बाशिंग बांधायची गरज नाही. अजून गिरीश बापट जाऊन फक्त तिसरा दिवस आहे. एवढी कसली घाई आहे? माणसुकी वगैरे प्रकार आहे की नाही? काही परंपरा महाराष्ट्राची आहे की नाही. लोक काय म्हणतील यांना जनाची नाही तर मनाची तरी आहे की नाही”
