पुण्याच्या राजकारणातून एक मोठी बातमी समोर आली असून पुण्यातील फायर ब्रँड नेते माजी नगरसेवक वसंत मोरे आज राज्याचे माजी मुख्यमंत्री आणि शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांची भेट घेणार आहेत आणि त्यामुळेच वसंत मोरे हे वंचित बहुजन आघाडीची साथ सोडत शिवसेना उद्धव बाळासाहेब ठाकरे गटात प्रवेश करणार असल्याच्या चर्चांना उधाण आलय.
12 मार्च 2024 रोजी वसंत मोरे यांनी महाराष्ट्र नवनिर्माण सेनेला जय महाराष्ट्र केला होता त्यानंतर लोकसभा निवडणुकीच्या पार्श्वभूमीवर वसंत मोरे यांनी वंचित बहुजन आघाडी मध्ये प्रवेश करत पुणे लोकसभा निवडणूक लढवली होती मात्र या निवडणुकीत वसंत मोरे यांना केवळ 32000 इतकी मतं मिळाली आणि त्यांचा पराभव झाला. त्यानंतर आता वसंत मोरे हे वंचित बहुजन आघाडीची साथ सोडत ठाकरे गटात प्रवेश करतील असं बोललं जात असून जर वसंत मोरे यांनी ठाकरे गटात प्रवेश केला तर त्यांना हडपसर विधानसभा मतदारसंघातून महाविकास आघाडीकडून उमेदवारी देखील मिळू शकते अशा चर्चा सुरू झाल्यात.
2007 मध्ये महाराष्ट्र निर्माण सेनेच्या तिकिटावर पुणे महानगरपालिकेत पहिल्यांदा नगरसेवक झालेल्या वसंत मोरे यांनी 2007 2012 आणि 2017 या तिन्ही निवडणुकांमध्ये पुणे महानगरपालिकेत प्रतिनिधित्व केलं असून पुणे महानगरपालिकेचे विरोधी पक्षनते पदही मोरे यांनी भूषवलं आहे.
