पुणे : शनिवारी शरद पवार (Sharad Pawar) यांना अस्वस्थ वाटू लागल्यामुळे तात्काळ डॉक्टरांकडून तपासणी करण्यात आली होती. विद्या प्रतिष्ठानच्या बैठकीमध्येच पवार यांना त्रास जाणवू लागल्याने जागेवरच डॉक्टरांकडून पवारांची तपासणी करण्यात आली. दरम्यान आज पुन्हा एकदा शरद पवार यांची तपासणी करण्यासाठी डॉक्टर गोविंद बागेत पोहोचले. डॉक्टरांनी तब्बल अर्धा तास शरद पवार यांची तपासणी केली. यानंतर शरद पवार यांची प्रकृती स्थिर असल्याचे डॉक्टरांकडून सांगण्यात आले. पवार यांना विश्रांती घेण्याचा सल्ला डॉक्टरांकडून देण्यात आला आहे. त्यामुळे शरद पवार यांनी पुरंदर तालुक्यातील आपले सर्व नियोजित कार्यक्रम रद्द केले आहेत.
दिवाळीनिमित्त संपूर्ण पवार कुटुंबीय बारामतीत आले आहे. शनिवारी सकाळी दहा वाजता एग्रीकल्चरल डेव्हलपमेंट ट्रस्ट या ठिकाणी पवार यांनी बैठकीला उपस्थिती लावली. त्यानंतर दुपारी चार वाजता विद्या प्रतिष्ठान या संस्थेच्या बैठकीकरीता शरद पवार विद्यानगरी येथे गेले असताना, त्यांना अचानक अस्वस्थ वाटू लागले.यानंतर तात्काळ बैठकीच्या ठिकाणी हृदयरोग तज्ञ डॉक्टर रमेश भोईटे डॉक्टर सनी शिंदे यांना बोलावून तपासणी केली. यावेळी पवार यांचा एसीजी देखील काढण्यात आला. सततच्या कार्यक्रमामुळे आणि विश्रांती न घेतल्यामुळे पवार यांना थकवा आला असल्याचे डॉक्टरांनी सांगितले. डॉक्टरांकडून शरद पवार यांना विश्रांतीचा सल्ला देण्यात आला आहे.
नवीन अपडेट मिळवण्यासाठी आमचे WhatsApp Group, facebook page ,Instagram, WhatsApp Channel,Twitter जॉइन करा.