मुंबई : शिवसेना हा आपलाच पक्ष आहे आणि त्यांचे चिन्हही आपलेच आहे,असा दावा करणाऱ्या शिंदे गटाकडून मुंबईमध्ये मोठ्या प्रमाणावर शक्ती प्रदर्शन देखील केले जात आहे. शिवसेना आमदारानंतर आता शिवसेनेचे खासदार देखील मोठ्या प्रमाणावर शिंदे गटाच्या मार्गावर असल्याचं सातत्याने निदर्शनास येत आहे.
दरम्यान संसदेच्या अधिवेशनात शिवसेनेच्या खासदारात फूट निर्माण करण्यात येईल अशी शक्यता शिवसेना खासदार विनायक राऊत यांनी देखील वर्तवली होती. दरम्यान मिळालेल्या माहितीच्या आधारे एकनाथ शिंदे यांच्यासोबत झालेल्या एका ऑनलाईन मीटिंगमध्ये शिवसेनेचे तब्बल 14 खासदार उपस्थित असल्याचे समजते आहे. यासह आणखी दोन खासदार देखील शिंदे यांच्या संपर्कात असल्याचे समजते आहे. यामुळे शिवसेना खासदारातील मोठी फूट पाहता उद्धव ठाकरे अडचणी वाढत आहे. दरम्यान श्रीकांत शिंदे आणि भावना गवळी यांच्यासह आणखी बारा आमदार नक्की कोण होते हे लवकरच समजेल.
शिंदे गटाकडून शिवसेनेची नवीन राष्ट्रीय कार्यकारिणी देखील जाहीर करण्यात आली असून, एकनाथ शिंदे यांची मुख्य नेतेपदी नियुक्ती करण्यात आली आहे. पक्षप्रमुख पदी कुणाचीही नियुक्ती करण्यात आलेली नाही. दीपक केसरकर यांची मुख्य प्रवक्तेपदी नियुक्ती करण्यात आली आहे. या 14 खासदारांविषयी केसरकर यांच्याकडे विचारणा केली असता ,त्यांनी मात्र स्पष्ट बोलणे टाळले आहे . परंतु सर्व खासदार आमच्या सोबत असल्याचे देखील सूचक वक्तव्य त्यांनी केले आहे.
