मुंबई : राज्यात मराठा आरक्षणाचा (Maratha Reservation) मुद्दा चांगलाच पेटला आहे. मराठा आरक्षणासाठी मनोज जरांगे पाटील पुन्हा एकदा उपोषणाला बसले आहेत. आज त्यांच्या उपोषणाचा सातवा दिवस आहे. एकीकडे हे आंदोलन शांतपणे चालले असताना दुसरीकडे मराठा समाजाने आक्रमक भूमिका घेल्याचे पाहायला मिळत आहे. या मराठा आंदोलनाचा आता मंत्र्यांनी धसका घेतल्याचे पाहायला मिळत आहे. मराठा आरक्षणाला पाठिंबा दर्शवत काही आमदार आणि खासदारांनी आपल्या पदाचा राजीनामा दिला आहे. यामध्ये 3 आमदार आणि 2 खासदार यांचा समावेश आहे.
आतापर्यंत कोणी-कोणी दिले राजीनामे
हिंगोलीचे शिवसेनेचे खासदार हेमंत पाटील
नाशिकचे शिवसेनेचे खासदार हेमंत गोडसे
वैजापूरचे शिवसेनेचे आमदार रमेश बोरनारे
परभणीचे काँग्रेसचे आमदार सुरेश वरपूडकर
गेवराईचे भाजपचे आमदार लक्ष्मण पवार
या आंदोलनाने बीड, पंढरपूर आणि धाराशिवमध्ये हिंसक वळण घेतले आहे. बीड आणि धाराशिवमध्ये संचारबंदी लागू करण्यात आली आहे. तसेच इंटरनेट सेवादेखील बंद ठेवण्यात आली आहे. सुरक्षेच्या कारणास्तव या जिल्ह्यांत मोठ्या प्रमाणात पोलीस बंदोबस्त तैनात करण्यात आला आहे.