परभणी : परभणीमध्ये आज शासन आपल्या दारी कार्यक्रमाचं आयोजन करण्यात आलेलं आहे. या कार्यक्रमासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस (Devendra Fadnavis) आणि उपमुख्यमंत्री अजित पवार हे उपस्थित राहिले आहेत. यावेळी बोलताना देवेंद्र फडणवीस यांनी एक मोठी घोषणा केली आहे. जसा मुंबई ते नागपूर समृद्धी महामार्ग झाला तसाच एक महामार्ग करणार असल्याचं फडणवीसांनी यावेळी जाहीर केले.
काय म्हणाले देवेंद्र फडणवीस?
नागपूर ते गोवा असा शक्तिपीठ महामार्ग करण्यात येणार आहे. या महामार्गाचा फायदा मराठवाड्याला होणार असल्याचं आश्वासन देवेंद्र फडणवीसांनी दिलं. या प्रकल्पामुळे मराठवाड्याचं भाग्य उजळेल असंही ते म्हणाले. परभणी शहरातले रस्ते खराब झालेले आहेत. मुख्यमंत्र्यांचं हेलिकॉप्टर खूप दूर उतरवण्यात आलं. खराब रस्ते दिसावेत म्हणून दूरचा प्रवास त्यांना करवून दिला.
मात्र तसं केलं नसतं तरी परभणीचे रस्ते तयार केले असते. मुख्यमंत्री एकनाथ शिंदे यांचं परभणीवर प्रेम असून येत्या काळात परभणीचं चित्र बदलणार असल्याचं फडणवीसांनी सांगितलं. परभणीमध्ये आता सिमेंट काँक्रिटचे रस्ते तयार करण्यात येतील, असा शब्द फडणवीसांनी यावेळी परभणीकरांना दिला.