पुणे: आगामी लोकसभा निवडणुकीत (Lok Sabha Elections) स्पष्ट बहुमत मिळवत सलग तिसऱ्यांदा भारतीय जनता पक्षाची सत्ता येणार असून नरेंद्र मोदी (Narendra Modi) पुन्हा एकदा पंतप्रधान होणार असल्याचा विश्वास माजी केंद्रीय माहिती प्रसारण मंत्री आणि राज्यसभा खासदार प्रकाश जावडेकर (Prakash Javadekar) यांनी व्यक्त केला आहे. ते पुण्यात पत्रकार परिषदेत बोलत होते.
या पत्रकार परिषदेला भाजपाचे पुणे शहराध्यक्ष जगदीश मुळीक, प्रदेश सरचिटणीस मुरलीधर मोहोळ, माजी आमदार आणि राष्ट्रीय महिला मोर्चाच्या उपाध्यक्षा मेधा कुलकर्णी, पुणे शहर उपाध्यक्ष आणि प्रवक्ते धनंजय जाधव, सहप्रचार प्रसिद्धीप्रमुख पुष्कर तुळजापूर आदी उपस्थित होते.
मोदी सरकार (Modi Government) सत्तेत येऊन 9 वर्ष पूर्ण झाली असून त्यानिमित्तानं भाजपाकडून मोदीपर्व @9 अभियान राबविण्यात येत असून या अभियानादरम्यान झालेल्या पत्रकार परिषदेत बोलताना जावडेकर म्हणाले पंतप्रधान नरेंद्र मोदींनी विकासाचा राजकरण करत 365 दिवस फक्त देशासाठी काम करतात आणि यामुळं 2024 च्या लोकसभा निवडणुकीत भाजपा 350 तर एनडीए 400 जागा जिंकेल असा विश्वास त्यांनी व्यक्त केला.