भंडारा : राजकीय वर्तुळातून एक धक्कादायक बातमी समोर आली आहे. भंडारा (Bhandara) विधानसभा क्षेत्राचे भाजपचे माजी आमदार अॅड. रामचंद्र अवसरे (Ramachandra Avasare) यांचं हृदयविकाराच्या तीव्र धक्क्याने (Heart Attack) निधन (Pass Away) झालं आहे. रामचंद्र अवसरे 65 वर्षांचे होते. रामचंद्र अवसरे हे भाजपच्या (BJP) प्रदेश कार्यकारिणीत निमंत्रित सदस्य होते. 2014 ते 2019 या कालावधीत ते भंडारा विधानसभा क्षेत्राचे भाजपचे आमदार राहिले आहेत. त्यांच्या निधनानंतर संपूर्ण भंडारा जिल्ह्यात शोककळा पसरली आहे.
रामचंद्र अवसरे हे भाजपची भंडारा येथील बैठक आटोपून मुलीच्या घरी मुक्कामासाठी गेले होते. पण तिथे त्यांची अचानक प्रकृती बिघडली. यानंतर त्यांच्या कुटुंबीयांनी त्यांना तातडीने भंडारा शहरातील एका हॉस्पिटलमध्ये दाखल केले. मात्र उपचारादरम्यान त्यांना हृदयविकाराचा तीव्र झटका आला आणि त्यातच त्यांचं निधन झालं. रामचंद्र अवसरे यांच्या निधनामुळे भंडारा जिल्ह्यात भाजपमध्ये मोठी पोकळी निर्माण झाली आहे.
रामचंद्र अवसरे यांची कारकीर्द?
माजी आमदार रामचंद्र अवसरे हे आधी शिवसेनेचे कार्यकर्ते होते. ते 2009 पर्यंत शिवसेनेत होते. पण 2009 ला त्यांनी शिवसेनेकडून उमेदवारी मिळाली नव्हती. त्यामुळे त्यांनी अपक्ष उमेदवारी लढवली होती. पण त्यावेळी त्यांना पराभवाला मुकावं लागलं होतं. या दरम्यान 2014 च्या विधानसभा निवडणुकीवेळी त्यांनी भाजपात प्रवेश केला. भाजपने त्यांना निवडणुकीचं तिकीट दिलं होतं. या निवडणुकीत ते जिंकून आले होते. ते 2014 ते 2019 या काळात आमदार होते.