सोलापूर : राजकीय वर्तुळातून एक मोठी बातमी समोर आली आहे. सोलापुरात शिवसेना उद्धव ठाकरे (Uddhav Thackeray) गटाला मोठा धक्का बसला आहे. शिवसेनेच्या स्थापनेपासून पक्षात सक्रिय असलेले ठाकरे गटाचे जिल्हा सहसंपर्कप्रमुख साईनाथ अभंगराव यांनी आपल्या पदाचा राजीनामा दिला आहे. पक्षात काय सुरू आहे? असं म्हणत त्यांनी आपला राजीनामा दिला आहे.
शिवसेना ठाकरे गटाकडून सोलापूर जिल्ह्यातून उपनेतेपदी शरद कोळी यांची निवड करण्यात आली आहे. मात्र त्यांच्या निवडीनंतर सोलापूर, पंढरपूर भागातील जुन्या शिवसैनिकांमधून नाराजीचा सूर उमटत आहे. यामुळेच साईनाथ अभंगराव यांनी आपला राजीनामा दिल्याचे समजत आहे. साईनाथ अभंगराव हे शिवसेनेत गेल्या 40 वर्षांपासून कार्यरत आहेत.
शिवसेनेत फूट पडल्यानंतर शरद कोळी यांनी ठाकरे गटात प्रवेश केला होता. लगेचच त्यांची पक्षाच्या प्रवक्तेपदी नियुक्ती करण्यात आली. त्यानंतर आत्ता काही दिवसांपूर्वी ठाकरे गटाकडून पुन्हा एकदा पक्षाची कार्यकारिणी नव्यानं जाहीर करण्यात आली आहे. त्यामध्ये शरद कोळी यांची उपनेतेपदी निवड करण्यात आली. मात्र ठाकरे गटाच्या या निर्णयाला शिवसैनिकांकडून विरोध होत असल्याचं समोर येत आहे. शरद कोळी यांची उपनेतेपदी निवड झाल्यामुळेच नाराज होत सोलापूर जिल्ह्याचे सहसंपर्कप्रमुख साईनाथ अभंगराव यांनी आपला राजीनामा दिला आहे. उद्धव ठाकरेंसाठी हा मोठा धक्का मानला जात आहे.